Քաղաքապետարանը դատարանով սրճարանից պահանջում է վերադարձնել Օպերայի հարակից հողամասը

Երեւանի քաղաքապետարանը քաղաքացիական հայց է ներկայացրել ընդդեմ «Մագնոլիա» ՍՊԸ–ի՝ պայմանագիրը լուծված համարելու, որպես հետեւանք իրավունքի գրանցումը դադարեցնելու, համայնքային հողամասն ազատելուն եւ Երեւան համայնքին վերադարձնելուն պարտավորեցնելու պահանջով։ Այս մասին տեղեկանում ենք News am–ից։ Լրատվամիջոցը նշում է, որ դատարանում քաղաքապետարանի շահերը կներկայացնի Երեւանի քաղաքապետարանի աշխատակազմի իրավաբանական վարչության պետ Զավեն Առաքլյանը։ Նշենք, որ «Մագնոլիա» ՍՊԸ-ին են պատկանում «Շոկոլադնիցա», «Մագնոլիա» սրճարանները, որոնք գործունեություն են իրականացնում Օպերայի տարածքում։ Հիշյալ ՍՊԸ–ի վարձակալության պայմանագրի ժամկետը մինչեւ 2026թ. է։ Լրատվականի հետ զրույցում «Մագնոլիա» ՍՊԸ տնօրեն Արսեն Մանուկյանն ասաց, որ դատարանից դեռեւս ծանուցում չեն ստացել։