Ամուսինները մեղադրվում են թմրամիջոցի մաքսանենգության, ապօրինի շրջանառության համար
ՀՀ քննչական կոմիտեի Երևանի քննչական վարչության ծանր հանցագործությունների քննության բաժնում կատարված բազմակողմանի քննությամբ պարզվել են թմրամիջոցների մաքսանենգության, ապօրինի շրջանառության դեպքի հանգամանքները: Ձեռք բերված ապացույցների հիման վրա՝ մեղադրանք է առաջադրվել ամուսիններին:
Քննությամբ ձեռք բերված տվյալների համաձայն՝ Երևանի բնակչուհին՝ ծնված 1966 թ., Նիդեռլանդների Թագավորությունում շուրջ 10 տարի ունենալով կացության իրավունք, հիվանդության պատճառով բժշկի կողմից օրինական կարգով ստացել է «Բուպրենորֆին» տեսակի թմրամիջոցի դեղահաբեր: Հայաստանի Հանրապետությունում ապօրինի իրացնելու նպատակով՝ վերջինս խոշոր չափով նշված դեղահաբերից մաքսանենգ ճանապարհով տեղափոխել է Հայաստան:
Մաքսանենգ ճանապարհով Հայաստան տեղափոխված խոշոր չափի «Բուպրենորֆին» տեսակի թմրամիջոցն ապօրինի իրացնելու վերաբերյալ նախնական համաձայնության գալով ամուսնու՝ 1985 թ. ծնված տղամարդու հետ՝ 2017 թ․ փետրվարի 21-ից մինչև հունիսի 1-ն ընկած ժամանակահատվածում, 53-ամյա կինը տարբեր օրերի ամուսնուն է փոխանցել նշված թմրամիջոցի դեղահաբեր, որոնք վերջինիս կողմից իրացվել են:
Բացի դրանից՝ քննությամբ տվյալներ են ձեռք բերվել, որ կինը ձեռք է բերել և ապօրինի կերպով կրել քաղաքացիական շեղբավոր սառը զենք համարվող, գործարանային արտադրության որսորդական ծալովի դանակ:
Ձեռք բերված բավարար ապացույցների համակցությամբ՝ կնոջը մեղադրանք է առաջադրվել՝ ՀՀ Քրեական օրենսգրքի 266-րդ հոդվածի 2-րդ մասի 1-ին և 2-րդ կետերով, 267.1-րդ հոդվածի 3-րդ մասի 1-ին կետով և 235-րդ հոդվածի 4-րդ մասով: Նրա նկատմամբ այլընտրանքային խափանման միջոց է կիրառվել գրավը: Ամուսնուն մեղադրանք է առաջադրվել՝ ՀՀ Քրեական օրենսգրքի 266-րդ հոդվածի 2-րդ մասի 1-ին և 2-րդ կետերով: Վերջինիս նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել նախաքննության օրինականության նկատմամբ հսկողություն իրականացնող դատախազին:
