Սոչիում Բելառուսի նախագահ Ալեքսանդր Լուկաշենկոյի հետ հանդիպումից հետո, լրագրողների հետ զրույցում Ռուսաստանի նախագահ Վլադիմիր Պուտինը հայտարարել է, որ լիակատար անկախ պետություններ աշխարհում պարզապես գոյություն չունեն, եւ ժամանակակից աշխարհում փոխկախվածությունն է տիրապետում։ Այս մասին հայտնում է «ՌԻԱ Նովոստի» լրատվական գործակալությունը։ «Անկախությունն ու ինքնիշխանությունը մոտ հասկացություններ են»,- նկատել է Պուտինը, շեշտելով, որ բացարձակ անկախ պետություններ, լինեն մեծ կամ փոքր, պարզապես գոյություն չունեն, քանի որ ժամանակակից աշխարհը փոխկախվածությունների աշխարհ է։ «Եվրոպայում օրինակ, Եվրախորհրդարանը ավելի շատ է բոլորի համար պարտադիր կատարման ենթակա որոշումներ կայացնում, քան ԽՍՀՄ-ն իր ժամանակին»,- հավելել է Պուտինը։