Գագիկ Ծառուկյանի թիկնապահը հայտնել է, որ իրեն ժողովուրդն է ստիպել քաղաքականություն մտնել

«Բարգավաճ Հայաստան» կուսակցության առաջնորդ Գագիկ Ծառուկյանի թիկնազորի պետ, ԲՀԿ պատգամավորի ռեյտինգային թեկնածու Էդուարդ Բաբայանն ընտրախախտումների մասին արտառոց դեպքեր չի լսել: «Նենց մանր-մունր բողոքներ եղել են, բայց կոնկրետ խախտում չեմ լսել»,-Tert.am-ի հետ զրույցում ընտրելուց հետո ասաց նա: Հարցին, թե կոնկրետ մանր դեպքեր ինչ նկատի ունի, պատասխանեց. «Դե ասում են՝ ուղղորդում են, բան են անում, բայց չեմ տեսել»: Դիտարկմանը, թե նույնը նաև Կոտայքի մարզպետն էր ասում, որ ներքին ուղղորդումներ կան, և թե տեղյակ չի, թե ո՞ր քաղաքական ուժի կողմից է, Բաբայանն արձագանքեց, որ իրենց էլ են ասել, բայց կոնկրետ ոչինչ չգիտի: «Բայց ես նայում եմ, ժողովուրդը ուրախ, հանգիստ գալիս է ընտրում, գնում»,-ասաց նա: Դիտարկմանը, թե նախկինում տեղամասեր լինում էին, որ քաղաքացիներին «գազելներով» բերում էին, նշեց. «Դե հիմա օրենք է փոխվել, ասում են՝ չի կարելի, տեսնում եք՝ մարդիկ ոտքով գալիս ընտրում, գնում են»: Հարցին, թե ինչը նրան ստիպեց այդուհանդերձ մտնել քաղաքականություն, Էդուարդ Բաբայանը նշեց՝ ժողովուրդը: «Մեր Աբովյանի, Կոտայքի մարզի ժողովուրդը ստիպեց, ասաց, որ պետք է գնաս պատգամավոր, որ մեր կողքը լինես, ավելի կարանաս մեզ օգտակար լինել»,-ասաց նա: Հիշեցնենք, որ «Բարգավաճ Հայաստան» կուսակցության նախագահ, «Ծառուկյան» խմբակցության ղեկավար Գագիկ Ծառուկյանի թիկնազորի պետ Էդուարդ Բաբայանը հուլիսի 3-ին ձերբակալվել էր։ Բաբայանը կասկածվում է Քրեական օրենսգրքի 112-րդ հոդվածի՝ դիտավորությամբ առողջությանը ծանր մարմնական վնասվածք հասցնելու հատկանիշներով: Ավելի ուշ նրան 20 միլիոն դրամ գրավի դիմաց ազատ էին արձակել։