Խոշոր հափշտակության համար մեղադրվող Մհեր Եղիազարյանը դուրս է եկել «Հայոց Արծիվներ. Միասնական Հայաստան» կուսակցությունից
Դադարեցնում եմ «Հայոց Արծիվներ Միասնական Հայաստան» կուսակցության անդամակցությունը և հրաժարվում եմ կուսակցության նախագահի տեղակալի պաշտոնից: Այս մասին հայտարարություն է տարածել Մհեր Եղիազարյանը, ում ԱԱԾ-ն վերագրում է խոշոր չափերի գումարի հափշտակություն:
«Հարգելի հայրենակիցներ
Նախաքննության գաղտնիությունից ելնելով՝ առայժմ չեմ անդրադառնում իմ քրեական գործի մանրամասներին, միայն ցանկանում եմ հայտնել բոլորին, այդ թվում իմ ընկեր կոչվողներին, որ յուրաքանչյուր ոք մեղավոր է համարվում միայն այն ժամանակ, երբ կա դատավճիռ:
Ուստի շնորհակալությունս եմ հայտնում բոլոր նրանց, ովքեր այս օրերին իմ կողքին են և հավատալով ինձ՝ փորձում են իրենց օժանդակությամբ նպաստել ճշմարտությունն ամբողջությամբ ի հայտ գալուն:
Շնորհակալ եմ ևս նրանց, ովքեր ընդհատակ են անցել, դրա համար ևս շատ ուրախ եմ:
Հ.Գ. ՏԵղեկացնեմ, որ դադարեցնում եմ «Հայոց Արծիվներ Միասնական Հայաստան» կուսակցության անդամակցությունը և հրաժարվում եմ կուսակցության նախագահի տեղակալի պաշտոնից, որպեսզի չսասանեմ կուսակցության և կուսակցության նախագահի հեղինակությունը»,- նշված է հայտարարության մեջ:
