Լուկաշենկո․ ՀԱՊԿ գլխավոր քարտուղարը կլինի Բելառուսի ներկայացուցիչ․ Հայկական կողմը հերքում է
Բելառուսի նախագահ Ալեքսանդր Լուկաշենկոն հայտնել է, որ ՀԱՊԿ գլխավոր քարտուղարի պաշտոնը փոխանցվելու է Մինսկին և այն զբաղեցնելու է Բելառուսի ներկայացուցիչը։
Լրագրողների այն հարցին, թե արդյոք Հայաստանը համաձայն է եղել այդ որոշմանը, Լուկաշենկոն ասել է, թե Հայաստանի անունից խոսել չի կարող։
Նա նշել է, որ գլխավոր քարտուղարի նշանակման հարցը կարելի է ասել լուծվել է։ Լուկաշենկոյի խոսքով՝ Սանկտ Պետերբուրգում քիչ էր մնում անցկացվեր ՀԱՊԿ-ի նիստը։
Հատկանշական է, որ տեղեկությունը մեծ հաշվով տարածվել է հիմնականում բելառուսական լրատվամիջոցներում։ Ռուսական կողմից այս առնչությամբ որևէ պարզաբանում դեռևս չկա, սակայն հայկական կողմն արդեն արձագանքել է։
ՀՀ վարչապետի պաշտոնակատար Նիկոլ Փաշինյանի մամուլի խոսնակ Արման Եղոյանը հայտնել է, որ ՀԱՊԿ գլխավոր քարտուղարի նշանակման հարցը լուծված չէ դեռ։ՀԱՊԿ նիստ ընդհանրապես տեղի չի ունեցել։ Հայաստանի դիրքորոշումն այս հարցում անփոփոխ է։
Հիշեցնենք, որ ավելի վաղ հաղորդվել էր, որ ՀԱՊԿ գլխավոր քարտուղարի ընտրության հարցը հետաձգվում է մինչև գալիք տարի։
