Գյումրեցի կնոջը 102 ռազմաբազայի զինծառայո՞ղն է սպանել․ ՇՄ դատախազը չի հերքել

Նախօրեին դեռևս չպարզված հանգամանքներում ծեծի հետևանքով Գյումրիում մահացել է Գյումրիի համայնքապետարանի բնակկոմունալ բաժնի աշխատակցուհի 1961 թվականին ծնված Ջուլիետա Ղ.ն: Galatv.am-ը գրում է, որ, ըստ որոշ տեղեկությունների, նրան ծեծելով սպանել է ռուսական 102 ռազմաբազայի զինծառայող: Այս տեղեկությունը չի հերքել և չի հաստատել ՇՄ դատախազ Կարեն Գաբրիելյանը: Գյումրիի համայնքապետարանից հայտնեցին, որ իրենց տեղեկություններն էլ սակավ են կատարված միջադեպի վերաբերյալ: Ջուլիետա Ղ.ն Գյումրիի համայնքապետարանում է աշխատել 2015 թվականի ապրիլից: Lրատվամիջոցին Գյումրիի համայնքապետարանից հայտնել են, որ կինը «նորմալ, մարդամոտ և շատ պարտաճանաչ աշխատող է եղել»։ Դեպքը տեղի է ունեցել Գյումրիի «Սլաբոդկա» կոչվող թաղամասում՝ դեկտեմբերի 2-ին: Կնոջը հիվանդանոց են տեղափոխել անգիտակից վիճակում: Նա մահացել է վերակենդանացման բաժանմունքում: Ստացած վնասվածքները եղել են հիմնականում գլխի շրջանում: