Թեհրանը մեծ ակնկալիքներ ունի Հայաստանի և Վրաստանի միջով անցնող տարանցիկ միջանցքից

Իրանի և Հայաստանի պաշտոնյաներն ընդգծել են ավտոմոբիլային տրանսպորտի ոլորտում համագործակցության զարգացման անհրաժեշտությունը: Այս մասին տեղեկացնում է իրանական Mehr-ը՝ հավելելով, որ պաշտոնյաները պնդել են, թե Իրան-Հայաստան-Վրաստան միջանցքի լիարժեք ակտիվացումը զգալիորեն կմեծացնի առևտրի ծավալը։

Ըստ աղբյուրի՝ տարածաշրջանային տրանսպորտային դիվանագիտության ակտիվացման շրջանակում չորեքշաբթի երեկոյան հանդիպում է տեղի ունեցել Հայաստանի տարածքային կառավարման և ենթակառուցվածքների նախարարի տեղակալ Արմեն Սիմոնյանի և Իրանի ճանապարհների և քաղաքաշինության նախարարի տեղակալի, ինչպես նաև Իրանի ճանապարհաշինության և տրանսպորտի կազմակերպության ղեկավար Ռեզա Աքբարիի մասնակցությամբ։

Նշվում է, որ բանակցությունների ընթացքում կողմերը քննարկել են ավտոմոբիլային տրանսպորտի ոլորտում համագործակցության զարգացման ուղիները՝ ընդգծելով տարանցիկ ենթակառուցվածքն ամրապնդելու և առկա խոչընդոտները վերացնելու հաստատակամությունը։

Աքբարին հայտարարել է, որ պատրաստվել է փոխըմբռնման հուշագրի համապարփակ նախագիծ, որի հիմնական ուշադրությունը կենտրոնացած է այնպիսի ոլորտների վրա, ինչպիսիք են ենթակառուցվածքների զարգացումը, սահմանով տրանսպորտի տեղաշարժի խոչընդոտների վերացումը, ճանապարհային վճարների նվազեցումը կամ չեղարկումը, ինչպես նաև Իրանի և Հայաստանի տարածքներում թողունակության մեծացումը։

Նա ընդգծել է հարևան երկրների հետ Իրանի առևտրային կապերի բարձր ներուժը և նշել, որ Իրան-Հայաստան-Վրաստան միջանցքն ի վիճակի է էլ ավելի ամրապնդել տարածաշրջանային առևտրային կապերը։

Իր հերթին, Հայաստանի նախարարի տեղակալը, ողջունելով Իրանի հետ տնտեսական և տրանսպորտային համագործակցության ընդլայնումը, հայտնել է ենթակառուցվածքային նախագծերի իրականացման առաջընթացի մասին։

Նա ընդգծել է, որ տարանցիկ ենթակառուցվածքը և Հայաստանի կողմից ձեռնարկվող մյուս միջոցները կարևոր դեր կխաղան վարորդների խնդիրների լուծման և սահմանային լոգիստիկայի բարելավման գործում։