Բելգորոդի Շեբեկինոյում ԱԹՍ-ի հարվածից զոհվել է 5, վիրավորվել՝ 23 մարդ

Հուլիսի 20-ին Բելգորոդի մարզի Շեբեկինո քաղաքում №109 երթուղու («Բելգորոդ–Շեբեկինո») ուղևորատար ավտոբուսը ենթարկվել է անօդաչու թռչող սարքի հարձակման։

Բելգորոդի մարզի նահանգապետի պաշտոնակատար Ալեքսանդր Շուվաևի տեղեկություններով՝ զոհվել է հինգ մարդ՝ չորս կին և մեկ անչափահաս տղա։ Զոհվածների ինքնությունը դեռևս ճշտվում է։

Վիրավորվել է 23 մարդ, այդ թվում՝ 17-ամյա դեռահաս։ Տուժածներից երեքի վիճակը ծայրահեղ ծանր է։ Նրանք տեղափոխվել են Շեբեկինոյի շրջանային հիվանդանոց, իսկ վիճակի կայունացումից հետո կտեղափոխվեն Բելգորոդի բուժհաստատություններ։

Տեղական աղբյուրների տվյալներով՝ անօդաչու սարքը զինված է եղել խոցող տարրերով՝ մանր մետաղական գնդիկներով։ Սոցիալական ցանցերում տարածվում են նաև նախազգուշացումներ, որ շրջանում օդային վտանգը պահպանվում է։

Շուվաևը հայտարարել է, որ սա հերթական ողբերգությունն է Բելգորոդի մարզի բնակիչների համար։

Սա վերջին շաբաթներին ուղևորատար տրանսպորտի դեմ առաջին նման հարձակումը չէ։ Հուլիսի 19-ին Դուբովոյե բնակավայրում ԱԹՍ-ի հարվածի հետևանքով զոհվել էր մեկ մարդ, ևս չորսը վիրավորվել էին, իսկ հուլիսի 6-ին Նիկոլսկոյե–Տավրովո ավտոճանապարհին անօդաչուի հարձակման հետևանքով վիրավորվել էր յոթ մարդ, այդ թվում՝ երկու երեխա։

Բացի ավտոբուսների վրա հարձակումներից, անօդաչու սարքերը շարունակում են հարվածներ հասցնել նաև քաղաքացիական ավտոմեքենաների և ենթակառուցվածքների օբյեկտների։ Վերջին մեկ օրում, ըստ օպերատիվ շտաբի, Բելգորոդի մարզի 13 համայնքներ ենթարկվել են հարձակումների։