Թրամփը վստահեցրել է, որ Նեթանյահուն ԱՄՆ-ում որևէ կերպ չի ձերբակալվի

ԱՄՆ նախագահ Դոնալդ Թրամփը հայտարարել է, որ Իսրայելի վարչապետ Բենիամին Նեթանյահուն ԱՄՆ այցի ընթացքում որևէ կերպ չի ձերբակալվի՝ արձագանքելով Նյու Յորքի քաղաքապետ Զոհրան Մամդանիի հայտարարությանը, թե քննարկվում է իսրայելցի վարչապետի հնարավոր ձերբակալության հարցը։

«Բենիամին Նեթանյահուն ԱՄՆ-ում գտնվելու ընթացքում որևէ կերպ չի ձերբակալվի»,- գրել է Թրամփը Truth Social սոցիալական հարթակում։

ԱՄՆ նախագահի խոսքով՝ Իսրայելի վարչապետը «պայքարում է Իրանի դեմ, որը սպանել է 52 հազար անմեղ ցուցարարի և վերջին 47 տարիների ընթացքում սպանել է ամերիկացի զինծառայողների և այլ մարդկանց»։

«Միակ մարդիկ, որոնք պետք է ձերբակալվեն, նրանք են, ովքեր Իրանին հասցրել են մահվան և ավերածությունների աննախադեպ պարույրին»,- հավելել է Թրամփը։

Ավելի վաղ Նյու Յորքի քաղաքապետ Զոհրան Մամդանին հայտարարել էր, որ Նեթանյահուն «ռազմական հանցագործ է, որի նկատմամբ Միջազգային քրեական դատարանը (ՄՔԴ) մեղադրանքներ է առաջադրել»։ Նրա խոսքով՝ «Նեթանյահուի տեղը Հաագայում է»։ Միաժամանակ նա նշել էր, որ դեռևս պարզ չէ՝ արդյոք Նյու Յորքի ոստիկանությունը կարող է ձերբակալել Նեթանյահուին, եթե նա սեպտեմբերին ժամանի ՄԱԿ-ի Գլխավոր ասամբլեայի նիստին մասնակցելու համար, սակայն այդ հարցը քննարկվում է քաղաքի իրավապահ մարմինների ղեկավարության հետ։

Հիշեցնենք, որ 2024 թվականի նոյեմբերին Միջազգային քրեական դատարանը Նեթանյահուի ձերբակալության օրդեր էր տվել՝ նրան մեղադրելով մարդկության դեմ և ռազմական հանցագործությունների մեջ՝ Գազայի հատվածում հակամարտության հետ կապված։

2025 թվականի փետրվարին Թրամփը ստորագրել էր հրամանագիր, որով պատժամիջոցներ էին սահմանվում ՄՔԴ-ի նկատմամբ՝ ԱՄՆ-ի և նրա դաշնակիցների, այդ թվում՝ Իսրայելի դեմ իրականացվող գործողությունների պատճառով։

ԱՄՆ-ը Ռոմի ստատուտի մասնակից չէ և բազմիցս հայտարարել է, որ չի ճանաչում Միջազգային քրեական դատարանի իրավազորությունը ԱՄՆ քաղաքացիների նկատմամբ։