Միջազգային արժույթի հիմնադրամը Ուկրաինային կհատկացնի ևս 690 մլն դոլարի վարկ

Միջազգային արժույթի հիմնադրամի (ԱՄՀ) գործադիր խորհուրդը հաստատել է Ուկրաինային ֆինանսական աջակցության նոր տրանշի տրամադրումը՝ գործող 48-ամսյա ընդլայնված ֆինանսավորման ծրագրի շրջանակում։

ԱՄՀ-ի հայտարարության համաձայն՝ առաջին վերանայման ավարտից հետո Ուկրաինան անմիջապես կստանա 503 միլիոն հատուկ փոխառության իրավունք (SDR), ինչը համարժեք է մոտ 690 միլիոն ԱՄՆ դոլարի։

Ուկրաինան վերջին տարիներին պետական բյուջեն ձևավորում է ռեկորդային պակասուրդով՝ հույսը դնելով արևմտյան ֆինանսական աջակցության վրա։ Այս տարվա պետական բյուջեի պակասուրդը կազմում է 1,9 տրիլիոն գրիվնա։

Միաժամանակ արևմտյան գործընկերները վերջին շրջանում ավելի հաճախ են ընդգծում, որ Կիևը պետք է ակտիվացնի սեփական ֆինանսավորման աղբյուրների որոնումը, քանի որ նոր օգնության փաթեթների տրամադրումը հաճախ ուղեկցվում է երկարատև քննարկումներով։