Մերձավոր Արևելքում գտնվող ամերիկացիներին կոչ են արել պատրաստ լինել չվերթների չեղարկմանը

ԱՄՆ Պետդեպարտամենտը Մերձավոր Արևելքում գտնվող իր քաղաքացիներին կոչ է արել պատրաստ լինել չվերթների հնարավոր չեղարկմանը և օդային տարածքի փակմանը։

Համապատասխան նախազգուշացումը հրապարակվել է Իրանի դեմ ԱՄՆ-ի շարունակվող հարվածների և Թեհրանի պատասխան գործողությունների ֆոնին։ Բացի այդ, ըստ The Washington Post-ի՝ ԱՄՆ-ը պատրաստվում է Իրանի դեմ լայնածավալ ռազմական գործողությունների՝ մեծացնելով տարածաշրջանում իր ռազմական ներկայությունը։

«Մերձավոր Արևելքում ներկայում գտնվող ամերիկացիները պետք է զգուշություն և առավելագույն զգոնություն ցուցաբերեն, ինչպես նաև պատրաստ լինեն չվերթների հնարավոր չեղարկմանը, օդային տարածքի պարբերական փակմանը և ուղևորությունների հավանական խափանումներին»,- ասված է Պետդեպարտամենտի հայտարարության մեջ։

Մերձավոր Արևելք մեկնել պատրաստվող ԱՄՆ քաղաքացիներին Պետդեպարտամենտը խորհուրդ է տվել վերանայել տարածաշրջան և դրա տարածքով տարանցիկ ուղևորությունների ծրագրերը։

Թեհրանն ու Վաշինգտոնը հունիսի 18-ի գիշերը ստորագրել էին հուշագիր, որը նախատեսում էր փետրվարի 28-ին սկսված հակամարտության ավարտը։ Սակայն հուլիսի 8-ից ամերիկյան զինված ուժերը մի քանի հարվածներ են հասցրել Իրանին։ ԱՄՆ Զինված ուժերի կենտրոնական հրամանատարությունը պնդում էր, որ դրանք իրականացվել են ի պատասխան Օրմուզի նեղուցով անցնող առևտրային նավերի դեմ Իրանի գործողությունների։

Իրանի զինված ուժերն ի պատասխան հարվածներ են հասցրել Մերձավոր Արևելքի մի շարք երկրներում տեղակայված ամերիկյան ռազմաբազաներին։ Թեհրանը նաև Վաշինգտոնին մեղադրել է ռազմական գործողությունների դադարեցման մասին հուշագիրը խախտելու մեջ։ ԱՄՆ նախագահ Դոնալդ Թրամփը հուլիսի 8-ին հայտարարել է, որ հրադադարն այլևս չի գործում։