Իսրայելը փորձում է համոզել ԱՄՆ-ին վերսկսել Իրանի վրա լայնածավալ հարվածները. WSJ

Իսրայելի ղեկավարությունը փորձում է համոզել ԱՄՆ իշխանություններին վերսկսել լայնամասշտաբ ռազմական գործողություններն Իրանի դեմ՝ նպատակ ունենալով էլ ավելի թուլացնել իսլամական հանրապետության հրթիռային ներուժը և ամբողջությամբ ոչնչացնել նրա միջուկային ծրագրի հետ կապված օբյեկտները: Այս մասին, հղում անելով աղբյուրներին, հայտնել է The Wall Street Journal (WSJ) պարբերականը:

Մասնավորապես, Իսրայելի հատուկ ծառայությունները ԱՄՆ-ին են փոխանցել տեղեկատվություն այն մասին, թե իբր Իրանը ուրանի հարստացման ցենտրիֆուգները տեղափոխում է Նաթանզից ոչ հեռու գտնվող Քիրքա լեռան տակի ստորգետնյա թունելներ: Իսրայելական հետախուզության տվյալներով՝ այս վայրում թունելների խորությունը հասնում է 140 մետրի: Իսրայելի ղեկավարությունը ակնկալում է, որ այս տեղեկատվությունը կազդի Իրանի նկատմամբ ԱՄՆ-ի հետագա քայլերի վրա և Վաշինգտոնին կդրդի հարվածների նոր, ավելի հզոր ալիքի:

WSJ-ն նշում է, որ այս գարնանը և 2025 թվականի հունիսին տեղի ունեցած հարվածների նախորդ ալիքների ժամանակ Քիրքա լեռան շրջանը առաջնահերթ թիրախների ցանկում չէր:

ԱՄՆ-ն և Իսրայելը Իրանի դեմ պատերազմը սկսել են փետրվարի 28-ին: Հունիսին Վաշինգտոնն ու Թեհրանը ստորագրեցին փոխըմբռնման հուշագիր, որը նախատեսում էր ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում: Սակայն հուլիսի 8-ի գիշերը ԱՄՆ-ն վերսկսեց լայնամասշտաբ հարվածները Իրանին՝ նրան մեղադրելով Հորմուզի նեղուցին վերաբերող մասով ձեռք բերված համաձայնությունների պայմանները խախտելու մեջ: