Հայտնի են դարձել Հորդանանում իրանական հարձակման նոր մանրամասներ

Wall Street Journal-ը, հղում անելով ԱՄՆ պաշտոնյաներին, հայտնել է Հորդանանի «Մուվաֆաք Սալթի» ավիաբազային հասցված իրանական հրթիռային հարվածի մանրամասները, որի հետևանքով զոհվել է երկու ամերիկացի զինծառայող:

Լրատվամիջոցի տվյալներով՝ հարվածները հասցվել են մարզասրահին, ինքնաթիռների ըմբարին և բնակելի բլոկին, որտեղ գտնվում էին քնած զինվորները: Սկզբում առաջին հրթիռը խոցել է բազայի մարզասրահը. թեև տագնապի ազդանշանը ժամանակին է միացել և հնարավորություն տվել զինծառայողներին պատսպարվել բունկերներում, մի քանի անձ ստացել է վիրավորում: 

Որոշ ժամանակ անց երկրորդ հրթիռը ընկել է ինքնաթիռների դատարկ ըմբարի վրա, իսկ երրորդ հարվածը բաժին է ընկել բնակելի բլոկին: Չնայած ազդարարման համակարգի կրկնակի աշխատանքին, ոչ բոլոր զինվորներին է հաջողվել հասնել ապաստարաններ: Պենտագոնի փոխանցմամբ՝ զոհվել են Հավայիից առաջին լեյտենանտը և Տեխասից շարքայինը, իսկ ևս մեկ զինծառայող համարվում է անհետ կորած: 

Ըստ պարբերականի՝ դեռ հայտնի չէ՝ զինծառայողները մահացել են շենքի ներսում, թե դեպի ապաստարան շարժվելիս: Թերթը նկատում է, որ երեք հրթիռների՝ ՀՕՊ համակարգերը ճեղքելու փաստը կարող է վկայել տարածաշրջանում գտնվող շուրջ 50 հազար զինծառայողների պաշտպանության խնդիրների մասին: