ԱՄՆ-ը նոր հարվածներ է հասցրել Իրանի ռազմական օբյեկտներին

ԱՄՆ-ի Կենտրոնական հրամանատարությունն ամփոփել է Իրանի ռազմական ենթակառուցվածքների ուղղությամբ իրականացված հերթական հարվածների արդյունքները:

Ամերիկյան զինված ուժերը թիրախավորել են Իրանի հրամանատարական կենտրոնները, ռազմածովային օբյեկտները, ՀՕՊ համակարգերը, ինչպես նաև հրթիռների ու ԱԹՍ-ների արձակման կայանքները՝ նպատակ ունենալով նվազեցնել Հորմուզի նեղուցում առևտրային նավերի վրա հարձակվելու Իրանի հնարավորությունները:

Ըստ նույն աղբյուրի՝ ռազմավարական նշանակություն ունեցող այդ նեղուցով առևտրային նավերի տեղաշարժը չի դադարել, և մայիսի սկզբից ի վեր ԱՄՆ Կենտրոնական հրամանատարության ուժերն ապահովել են մոտ 900 առևտրային նավի ու 450 միլիոն բարել հում նավթի անվտանգ անցումը:

Pars Today-ը հայտնում է, որ Իրանի Չաբահար և Քոնարակ քաղաքներում գրանցվել է առնվազն 14 պայթյուն, իսկ պայթյունների ձայներ են լսվել նաև երկրի հարավում գտնվող Սիրիկ քաղաքում:

Իր հերթին, IRIB պետական հեռուստառադիոընկերությունը փոխանցում է, որ հարձակման թիրախ են դարձել նաև Շիրազն ու Բենդեր Աբբասը: