ԱՄՆ-ը ցանկանում է ՄԱԿ-ում ընդունել համացանցում խոսքի ազատության մասին հռչակագիր. Politico

ԱՄՆ-ն սեպտեմբերին կայանալիք ՄԱԿ-ի Գլխավոր ասամբլեայի նստաշրջանում կձգտի ընդունել «խոսքի ազատության մասին» հռչակագիր, որը անուղղակիորեն ուղղված է Եվրամիության կողմից առցանց հարթակների վերահսկման ոլորտում կիրառվող կարգավորումներին։ Այս մասին հայտնում է Politico-ն։

Պարբերականը հիշեցնում է, որ ԱՄՆ ներկայիս վարչակազմը բազմիցս քննադատել է տարբեր երկրներում առցանց հարթակների բովանդակության մոդերացիային վերաբերող կանոնները։

Հռչակագրին միացած երկրները կպարտավորվեն ընդունել, որ «ապատեղեկատվության» և «ատելության խոսքի» համար կիրառվող պատժամիջոցները կարող են վտանգել խոսքի ազատությունը։ Բացառություն է նախատեսվում միայն այն բովանդակության համար, որն ուղղակիորեն կոչ է անում բռնության։

Politico-ի տեղեկություններով՝ փաստաթուղթը նաև նպատակ ունի պաշտպանել առցանց հարթակներին կառավարությունների կողմից բովանդակությունը վերահսկելու և հեռացնելու պահանջներից։

Պարբերականը նշում է, որ ամերիկյան տեխնոլոգիական ընկերությունները հաճախ դժգոհում են Եվրամիությունում գործունեության համար սահմանված պահանջներից բխող լրացուցիչ ծախսերից և պարտավորություններից։

Միաժամանակ, հայտնի չէ, թե արդյոք այդ ընկերությունները մասնակցել են հռչակագրի մշակմանը։