«Քանաքեռցի Տույի» սպանության գործով դատարանը շուտով կկայացնի վճիռ

Ինչպես հայտնում է «Փաստինֆո»-ն, շուրջ հինգ տարի քննվող աղմկահարույց գործով մեղադրողն ու տուժող կողմը պահանջել են մեղավոր ճանաչել ամբաստանյալներին, իսկ պաշտպանության կողմը՝ արդարացնել։ Գործը քննվում է Երևանի ընդհանուր իրավասության քրեական դատարանում՝ դատավոր Մանվել Շահվերդյանի նախագահությամբ։

«Փաստինֆո»-ի փոխանցմամբ՝ դատաքննության ընթացքում դատարանն անթույլատրելի ապացույց է ճանաչել Արտուշ Սիմոնյանի տան բակի տեսախցիկների DVR տեսագրությունը։ Տուժող կողմի ներկայացուցիչ, փաստաբան Ռոբերտ Խաչատրյանը պնդում է, որ այդ տեսանյութում երևում է՝ առաջին կրակոցն արձակվել է Արտուշ Սիմոնյանի կողմից, և որոշումը պատրաստվում են բողոքարկել։

Փաստաբանի խոսքով՝ գործով ներկայացված շարժառիթը՝ կենդանաբանական այգու մսի մատակարարման հետ կապված ֆինանսական վեճը, հիմնված է վիճարկվող ցուցմունքների վրա և խախտում է անմեղության կանխավարկածը։ Նա նաև պնդում է, որ գործի նյութերը չեն հաստատում այն վարկածը, թե տուժող կողմը սպանության նպատակով է գնացել Սիմոնյանի տուն։

Հիշեցնենք՝ 2021 թվականի նոյեմբերի 11-ին Քանաքեռում տեղի ունեցած զինված ընդհարման հետևանքով սպանվել էին քրեական հեղինակություն Արթուր Ղազարյանը՝ «Քանաքեռցի Տույը», ԱԺ նախկին պատգամավոր Արտուշ Սիմոնյանը, ինչպես նաև ևս երկու անձ։ Գործով մեղադրանք է առաջադրվել Արտուշ Սիմոնյանի որդիներին և նրանց մտերիմներից մեկին։