Ուկրաինայում բնակվող գործարարը կարող է դառնալ Մոլդովայի վարչապետ

Մոլդովայի նախագահ Մայա Սանդուն լրագրողների հետ ճեպազրույցի ժամանակ հայտնել է, որ «Գործողության և համերաշխության կուսակցության» անդամների հետ խորհրդակցությունների արդյունքում ստորագրել է հրամանագիր, որով վարչապետի թեկնածու է առաջադրել Վասիլի Տոֆանին։ 

Նախագահի պարզաբանմամբ՝ ձևավորվելիք նոր կառավարության գլխավոր նպատակներն են լինելու տնտեսության զարգացումը, ներդրումների ներգրավումը, ինչպես նաև արդարադատության համակարգի մաքրումը կոռուպցիայից։ Գործող օրենսդրության համաձայն՝ առաջադրված թեկնածուն 15-օրյա ժամկետում պարտավոր է խորհրդարանի դատին հանձնել իր կաբինետի կազմն ու ծրագիրը։ Կառավարության հաստատման համար անհրաժեշտ է 101 պատգամավորներից նվազագույնը 51-ի կողմ ձայնը, մինչդեռ խորհրդարանական մեծամասնություն կազմող իշխող կուսակցությունն իր տնօրինության տակ ունի 63 մանդատ։ 

Ավելի վաղ՝ հուլիսի 3-ին, հանրությանը հայտնի դարձավ Մոլդովայի վարչապետ Ալեքսանդրու Մունտեանուի հրաժարականի մասին։ Նա X-ի իր միկրոբլոգում գրել էր. «Այսօր իմ վարչապետական ​​ժամկետն ավարտվում է։ Ես որպես վարչապետ ծառայելու պատասխանատվությունը ստանձնել եմ պարտքի խորը զգացումով և հաստատակամ վստահությամբ, որ կարող եմ օգնել դրական փոփոխություններ կատարել։ Այն պահին, երբ հասկացա, որ այլևս չեմ կարող իրականացնել իմ մանդատն իմ սկզբունքներին և համոզմունքներին համապատասխան, որոշեցի հրաժարական տալ»։