Մարդիկ վարկերի տակ ճռռում են. Նարեկ Կարապետյանը Սիսում լսել է գյուղացիներին

«Ուժեղ Հայաստան» կուսակցության խորհրդի անդամ Նարեկ Կարապետյանը թիմակիցների հետ միասին շարունակում է իրականացնել համայնքային այցելություններ՝ տեղում ծանոթանալով գյուղացիների մտահոգություններին։ Հերթական այցի ընթացքում նրանք ֆիքսել են Արարատի մարզի Սիս համայնքի բնակիչների կողմից բարձրաձայնված խնդիրները։

«Գյուղացին, մարդն ի՞նչ է ուզում, արժանապատիվ ապրել, չարչարանքին համապատասխան ապրել։ Այսօր մարդիկ վարկերի տակ ճռռում են, լույսի պես բերքը չեն կարողանում վաճառել։ Գյուղացին դրանով է ապրում։ Մեր երկիրը սրտացավ տիրոջ կարիք ունի»,-ասել է Սիսի մի բնակիչ իր տանը հյուրընկալած Նարեկ Կարապետյանին։

Կարապետյանը պարզաբանել է, որ սա առաջին դեպքն է, երբ Փաշինյանի քաղաքական ուժն ընտրական գործընթացներում ստանում է այդքան ցածր տոկոսով ձայներ, իսկ իրենք ունեցել են ընդամենը 6 ամիս ժամանակ։

«Մարդիկ մեզ վստահել են, մարդիկ պետք է տեսնեն, որ եկանք, երկար մնալու ենք ու փոխելու ենք»,-ասել է Կարապետյանը։