20:00 Լուրերը մեկ տողով. Աջակցություն Գագիկ Ծառուկյանին և Արեգնազ Մանուկյանին, շոգի նոր ալիք Հայաստանում

Անցած ժամվա լուրերը՝ հակիրճ և բովանդակային.

·  Հանրային ոլորտի ավելի քան 100 ներկայացուցիչներ և ընդդիմադիր կին պատգամավորներ հանդես են եկել ի պաշտպանություն Գագիկ Ծառուկյանի ու Արեգնազ Մանուկյանի: Նրանք դատապարտել են ձեռնարկությունների աշխատանքի ընդհատումը և կոչ արել անհապաղ վերանայել կիրառված կալանքի որոշումները:

·  Իրավապահները խուզարկություն են իրականացրել «Օլիմպավանում» և կապարակնքել Ազգային օլիմպիական կոմիտեի տարածքը: Ուսումնամարզական հավաքների մասնակցող օտարերկրյա տասնյակ մարզիկներ ստիպված են եղել րոպեների ընթացքում լքել կենտրոնը:

·  Արեն Մկրտչյանը հրաժարվել է Ազգային ժողովի պատգամավորի մանդատից: Նա հայտարարել է, որ գործունեությունը շարունակելու է Լոռու մարզպետի պաշտոնում:

·  ԱՄՆ-ն վերականգնել է պատժամիջոցները Իրանի դեմ և հարվածներ հասցրել վերջինիս ռազմական թիրախներին: ՄԱԳԱՏԷ-ի գլխավոր տնօրենը կողմերին զսպվածության կոչ է արել և անընդունելի համարել հարձակումները ատոմակայանների վրա:

·  Դաղստանում հորդառատ անձրևների պատճառով հեղեղումներ և սողանքներ են առաջացել, ինչի հետևանքով փլուզվել են ճանապարհներ ու կամուրջներ: Բնական աղետի պատճառով ընդհատվել է տրանսպորտային հաղորդակցությունը ավելի քան 50 լեռնային բնակավայրերի հետ:

·  Նիդեռլանդներում վանդալիզմի դեպք է գրանցվել, որի ընթացքում պղծվել են խորհրդային զինվորների մոտ 150 գերեզմանաքարեր: Տեղի ոստիկանությունը հետաքննություն է անցկացնում չարագործներին հայտնաբերելու համար:

·  Ֆուտբոլի աշխարհի առաջնության քառորդ եզրափակիչում այսօր կիսաեզրափակիչի ուղեգրի համար կմրցեն Իսպանիայի և Բելգիայի հավաքականները: Հանդիպումը կմեկնարկի Երևանի ժամանակով 23:00-ին:

·  Հայաստանի տարածքում առաջիկա օրերին սպասվում է հիմնականում առանց տեղումների եղանակ, միայն հյուսիսային շրջաններում հնարավոր է կարճատև անձրև: Օդի ջերմաստիճանը հուլիսի 11-ին կբարձրանա ևս 3-5 աստիճանով, հուլիսի 12-ի ցերեկը միայն Լոռիում և Տավուշում կնվազի 4-5 աստիճանով: Երեկոյան ժամերին սպասվում է քամու ուժգնացում: