Փաշինյանը նոր նախաձեռնություն է քննարկել․ քաղաքացիները կարող են ֆինանսավորել ԶԼՄ-ներին, ՔՀԿ-ներին և կուսակցություններին

Վարչապետ Նիկոլ Փաշինյանի գլխավորությամբ կայացած խորհրդակցության ժամանակ քննարկվել է համընդհանուր հայտարարագրման համակարգով քաղաքացիական հասարակական կազմակերպություններին (ՔՀԿ), զանգվածային լրատվության միջոցներին (ԶԼՄ) և կուսակցություններին նվիրատվություններ անելու մեխանիզմների ստեղծման հնարավորությունը։

Մասնավորապես, նախատեսվում է ֆիզիկական անձանց եկամուտների հայտարարագրման համակարգի միջոցով գործարկել ՔՀԿ-ներին, ԶԼՄ-ներին ու կուսակցություններին սոցիալական հատկացումների կամ ծախսերի նոր համակարգ: Ըստ ներկայացվածի՝ այս համակարգի ներդրմամբ նպատակ է հետապնդվում ստեղծել հայտարարագրեր ներկայացնելու նոր խթաններ, խթանել ՔՀԿ-ների և ԶԼՄ-ների ֆինանսական անկախությունը, ինչպես նաև բարձրացնել դրանց գործունեության թափանցիկությունն ու հաշվետվողականությունը: 

Շեշտվել է նաև նոր համակարգի միջոցով քաղաքական ինստիտուցիոնալ մեխանիզմների զարգացման կարևորությունը: Խորհրդակցության ավարտին վարչապետը նշել է, որ համակարգի նպատակն է քաղաքացիներին հնարավորություն ընձեռել աջակցելու իրենց նախընտրած հասարակական, լրատվական կամ քաղաքական կառույցներին, ինչպես նաև երաշխավորել ֆինանսավորման թափանցիկությունը: Նիկոլ Փաշինյանը հանձնարարական է տվել քննարկման ընթացքում հնչած դիտարկումների հիման վրա վերջնական տեսքի բերել ներկայացված նախագիծը։