Փաշինյանի որոշմամբ ստեղծվել է աշխատանքային խումբ՝ լրատվամիջոցներում հրապարակված նյութերն ուսումնասիրելու համար

Վարչապետ Նիկոլ Փաշինյանի որոշմամբ ստեղծվել է աշխատանքային խումբ, որը կկատարի համապարփակ ուսումնասիրություն՝ կապված լրատվամիջոցներում հրապարակված նյութերի հետ։ Այս մասին փոխանցում է News.am-ը։

Որոշման համաձայն՝ աշխատանքային խումբը կգնահատի վարչապետի 2026 թվականի մայիսի 15-ի N 439-Ա որոշման կատարման ընթացքը և դրա վերաբերյալ զանգվածային լրատվության միջոցներում տեղ գտած հրապարակումները։

Աշխատանքային խումբը ղեկավարելու է վարչապետի աշխատակազմի ղեկավարի տեղակալ Արմենակ Խաչատրյանը։

 Խմբում ընդգրկված են նաև Ֆինանսների նախարարի տեղակալ Ավագ Ավանեսյանը,

 վարչապետի աշխատակազմի իրավաբանական վարչության պետ Հայկ Կեսոյանը,

 սոցիալական հարցերի վարչության պետ Սերգեյ Թաշչյանը,

 Պետական վերահսկողական ծառայության սոցիալական ոլորտի վերահսկողության վարչության պետ Դավիթ Այվազյանը։

Որոշմամբ սահմանվել է, որ աշխատանքային խումբը մինչև 2026 թվականի հուլիսի 30-ը պետք է վարչապետին ներկայացնի ուսումնասիրության վերջնական արդյունքները։

Նշվում է նաև, որ անհրաժեշտության դեպքում աշխատանքային խումբը կարող է պետական կառավարման մարմիններից պահանջել և ստանալ անհրաժեշտ փաստաթղթեր ու տեղեկություններ, կատարել հարցումներ, ինչպես նաև քննարկումներին հրավիրել պետական մարմինների ներկայացուցիչների և փորձագետների։

Բացի այդ, մի շարք գերատեսչությունների ղեկավարներին և Կոտայքի մարզպետին հանձնարարվել է ապահովել աշխատանքային խմբի քննարկումներին հրավիրված պաշտոնատար անձանց մասնակցությունը։