Դանիայի վարչապետը հիասթափված է, որ Թրամփը չի փոխել իր դիրքորոշումը Գրենլանդիայի հարցում

Դանիայի վարչապետ Մետե Ֆրեդերիկսենը ափսոսանք է հայտնել, որ ԱՄՆ նախագահ Դոնալդ Թրամփը չի փոխել իր դիրքորոշումը Գրենլանդիայի հարցում։ Այդ մասին հայտնում է EFE գործակալությունը։

«Երեկ լսեցի ԱՄՆ նախագահի հայտարարությունները, և կարծում եմ՝ ԱՄՆ-ի դիրքորոշումն այս հարցում, ցավոք, շատ հստակ է։ Սակայն մեր դիրքորոշումն էլ նույնքան հստակ է, որքան միշտ եղել է։ Գրենլանդիան վաճառքի ենթակա չէ», - ասել է Ֆրեդերիկսենը։

Նրա խոսքով՝ Դանիան ակնկալում է, որ բոլոր երկրները, այդ թվում՝ իր դաշնակիցները, կհարգեն Գրենլանդիայի ժողովրդի ինքնորոշման իրավունքը։

«Մենք ինքնիշխան պետություն ենք, և անհրաժեշտ է, որ բոլորը հարգեն մեր տարածքային ամբողջականությունն ու ինքնիշխանությունը», - ընդգծել է նա։

Ֆրեդերիկսենի հայտարարությունը հնչել է այն բանից հետո, երբ Դոնալդ Թրամփը կրկին պնդել էր, որ Գրենլանդիան պետք է գտնվի ԱՄՆ-ի վերահսկողության տակ։ Նա նաև կրկնել էր իր նախկին մեղադրանքը, թե Դանիան բավարար քայլեր չի ձեռնարկում արկտիկական այդ տարածքի պաշտպանության համար։