Լիբանանում զոհերի թիվը նոր շեմ է հատել

Իսրայելի հարձակումների հետևանքով Լիբանանում զոհերի թիվը գերազանցել է 4000-ը:

Լիբանանի առողջապահության նախարարության տվյալներով՝ մարտի 2-ից ի վեր զոհերի թիվն աճել է՝ հասնելով 4057-ի, իսկ վիրավորների թիվը՝ 12 121-ի։

«Իսրայելի ռազմաօդային ուժերի կողմից Լիբանանի հարավում «Հեզբոլլահ» խմբավորման հենակետերին հասցված հարվածների հետևանքով մեկ օրվա ընթացքում զոհվել է 77 մարդ, ևս 120-ը ստացել են տարբեր աստիճանի վնասվածքներ», - հայտնել են գերատեսչությունից։

Նշվում է, որ Նաբաթիե քաղաքում և հարակից շրջաններում շարունակվում են փրկարարական աշխատանքները՝ իսրայելական ռմբակոծություններից հետո։ Ակնկալվում է, որ զոհերի և վիրավորների թիվը կարող է աճել:

«Շաբաթ օրը Քֆար-Ռումման շրջանում իսրայելական անօդաչու թռչող սարքի հարձակման հետևանքով զոհվել է մեկ զինծառայող», - հավելել են նախարարությունից։