Վաշինգտոնը չի փոխի իր կուրսը, չի նահանջի դիրքերից

Վաշինգտոնը մտադիր է շարունակել Թեհրանի հետ համաձայնության հասնելու ջանքերը, այդ թվում՝ Իրանի միջուկային ծրագրի հարցի կարգավորման ուղղությամբ՝ անկախ Իսրայելի դիրքորոշումից։ Այս մասին Fox News-ին տված հարցազրույցում հայտարարել է ԱՄՆ փոխնախագահ Ջեյ Դի Վենսը։

«Մենք ունակ ենք հասնել Իրանի միջուկային ծրագրի խնդրի երկարաժամկետ լուծմանը։ Իսրայելին դա կարող է դուր գալ կամ չգալ, սակայն մենք սկզբունքորեն համոզված ենք, որ նման քայլը համապատասխանում է Միացյալ Նահանգների ազգային շահերին։ Հետևաբար, մենք չենք դադարեցնի աշխատանքն այդ ուղղությամբ», - նշել է նա։

Վենսը հավելել է, որ Թեհրանի կողմից Վաշինգտոնի հետ ձեռք բերված պայմանավորվածությունների իրական կատարումը լինելու է դրանց արդյունավետության հիմնական ցուցիչներից մեկը։