Դանիել Իոաննիսյանը հրապարակել է վիճակագրություն ընտրատեղամասերից

«Անկախ դիտորդ»-ը շարունակում է ամփոփել ընտրությունների ընթացքում իրականացված դիտորդական առաքելության արդյունքները։ Դաշինքի ներկայացուցիչ Դանիել Իոաննիսյանի փոխանցմամբ՝ մինչ այս պահը դիտորդներին հաջողվել է այցելել հանրապետության 1830 ընտրատեղամաս, ինչը կազմում է բոլոր ընտրատեղամասերի շուրջ 92 տոկոսը։

Ներկայացված տվյալների համաձայն՝ տարբեր բնույթի խախտումներ արձանագրվել են դիտարկված ընտրատեղամասերի մոտ 44 տոկոսում։ Դրանց զգալի մասը վերաբերում է ընտրական գործընթացի կազմակերպմանն ու քվեարկության գաղտնիության ապահովմանը։ Արձանագրվել են նաև ընթացակարգային խախտումներ, քարոզչության դեպքեր, ինչպես նաև առանձին տեղամասերում լարված իրավիճակներ և վեճեր։

Դիտորդների գնահատմամբ՝ որոշ դեպքերում արձանագրված խախտումները կարող էին ռիսկեր ստեղծել քվեարկության գաղտնիության պահպանման համար։ Քարոզչության դրսևորումները հիմնականում կապված են եղել քաղաքական ուժերի խորհրդանիշներով կամ քարոզչական բովանդակությամբ հագուստի և տարբերանշանների օգտագործման հետ, որոնք, ըստ ներկայացված տեղեկությունների, հիմնականում արձանագրվել են օրվա սկզբին և հետագայում կարգավորվել։

Դաշինքը հրապարակել է նաև վիճակագրություն այն դեպքերի վերաբերյալ, երբ հնարավոր է եղել պարզել խախտումների հեղինակներին։ Ըստ ներկայացված տվյալների՝ խախտումների մի մասը վերագրվել է տեղամասային ընտրական հանձնաժողովների անդամներին, քաղաքական ուժերի վստահված անձանց, ընտրողներին և առանձին դեպքերում՝ ոստիկանության ծառայողներին։

«Անկախ դիտորդ»-ը նշում է, որ տվյալների հավաքագրումն ու մշակումն շարունակվում են, իսկ ընտրական գործընթացի ավարտից հետո կներկայացվի առավել ամբողջական զեկույց՝ արձանագրված խախտումների, դրանց բնույթի և ընտրությունների ընդհանուր գնահատականի վերաբերյալ։