Օվերչուկի ուղերձը՝ Երևանին․ դա չպետք է արվի Ռուսաստանի հաշվին

Հայաստանը կարող է ընտրություն կատարել հօգուտ Եվրոպական միության, եթե գտնում է, որ դա ավելի ձեռնտու տարբերակ է, սակայն դա չպետք է արվի Ռուսաստանի հաշվին։ Այս մասին Պետերբուրգյան միջազգային տնտեսական համաժողովի (ՊՄՏՀ) շրջանակում հայտարարել է ՌԴ փոխվարչապետ Ալեքսեյ Օվերչուկը՝ պատասխանելով Երևանի ու Եվրասիական տնտեսական միության (ԵԱՏՄ) հնարավոր վերջնական հարաբերությունների խզման մասին հարցին։

Ռուսաստանի կառավարության ներկայացուցիչը նշել է, որ Մոսկվան կողմ է այն որոշումներին, որոնք հենց հայ ժողովուրդն է համարում լավագույնն իր համար։ Ըստ նրա՝ Եվրամիությանն անդամակցելու կամ այդ ուղղությամբ գնալու որոշումը բացառապես Երևանի իրավասությունների տիրույթում է, եթե երկրում առկա է նման ցանկություն։

Միևնույն ժամանակ, Օվերչուկը հատուկ ընդգծել է, որ արտաքին քաղաքական կողմնորոշման նման փոփոխությունը չպետք է բացասաբար անդրադառնա Ռուսաստանի Դաշնության շահերի վրա կամ իրականացվի վերջինիս հաշվին։