Վոլոդինի աղմկահարույց հայտարարությունը. Հայաստանը կարող է կրկնել Ուկրաինայի ճակատագիրը

Ռուսաստանի Դաշնության Պետական դումայի նախագահ Վյաչեսլավ Վոլոդինը հայտարարել է, որ Եվրոպական միությունը Հայաստանին տնտեսական առաջընթացի խոստումներ է տալիս, որոնք նման են ժամանակին Ուկրաինային տրված խոստումներին։ Նրա խոսքով՝ ուկրաինական արտադրանքն այդպես էլ մուտք չգործեց եվրոպական շուկաներ՝ մրցունակ չլինելու պատճառով։

Խոսելով հայկական արտահանման հեռանկարների մասին՝ Վոլոդինը նշել է, որ ներկայումս Հայաստանն իր գինեգործական արտադրանքն իրացնում է ռուսական շուկայում։ Ըստ Պետդումայի խոսնակի՝ չնայած Ֆրանսիայի նախագահ Էմանուել Մակրոնի և Հայաստանի վարչապետ Նիկոլ Փաշինյանի ջերմ հարաբերություններին, հայկական արտադրանքի արտահանման նոր պայմանագրեր Ֆրանսիայի հետ չեն կնքվել։

Ռուս պաշտոնյան նաև ընդգծել է, որ ֆրանսիական կողմի պահանջով հայկական կոնյակն այսուհետ պետք է անվանվի «բրենդի»։ Վոլոդինի համոզմամբ՝ նման զիջումների պատճառով երկիրը ռիսկի է դիմում կորցնել սեփական ինքնությունը, ինչպես որ, ըստ նրա ձևակերպման, տեղի է ունեցել Ուկրաինայի պարագայում։