Պատիժն անխուսափելի է լինելու․ Կրեմլի զգուշացումը

Դոնեցկի տարածաշրջանում «Մոսկվա-Սիմֆերոպոլ» ուղղությամբ ընթացող միջքաղաքային ավտոբուսը Ենակիևո բնակավայրի մոտակայքում ենթարկվել է հարվածային անօդաչու թռչող սարքի հարձակման։ Ըստ նախնական տեղեկությունների՝ միջադեպի հետևանքով տեղում մահացել է 7 մարդ, ևս 11 ուղևոր ստացել է տարբեր աստիճանի մարմնական վնասվածքներ։ Տուժածների հստակ թվի և նրանց առողջական վիճակի վերաբերյալ տվյալները ներկայումս ճշտվում են տեղի ծառայությունների կողմից։

Կատարվածին արձագանքել է Ռուսաստանի նախագահի մամուլի քարտուղար Դմիտրի Պեսկովը։ Նա հայտարարել է, որ խաղաղ բնակչության դեմ իրականացված այս գործողությունները պետք է դառնան մանրակրկիտ քննության առարկա։ Կրեմլի ներկայացուցչի խոսքով՝ նմանատիպ հարձակումների կազմակերպիչներն ու իրականացնողները պետք է անխուսափելիորեն ենթարկվեն պատասխանատվության։

Լրագրողների այն հարցին, թե արդյոք խաղաղ բնակավայրերի և տրանսպորտային միջոցների թիրախավորումը կարող է ազդել ուկրաինական հակամարտության կարգավորման ներկայիս ձևաչափի փոփոխության վրա, ՌԴ նախագահի խոսնակը բացասական պատասխան է տվել։ Պեսկովը նշել է, որ բանակցային կամ կարգավորման գործընթացի վերաձևակերպման վերաբերյալ որևէ տեղեկատվություն առկա չէ և նման փոփոխություն չի նախատեսվում։ 

«Սա Կիևի ռեժիմի կողմից կատարված ևս մեկ հանցագործություն է։ Նրանք դիտավորյալ թիրախավորում են քաղաքացիական բնակչությանը, քաղաքացիական բնակչությանը։ Սա աններելի է։ Սա պետք է հետաքննվի, և նման հանցագործությունների համար պատասխանատուները, իհարկե, պետք է պատժվեն։ Եվ պատիժը, ինչպես ասաց նախագահը, պետք է անխուսափելի լինի», - ասել է Պեսկովը։