Ռուսաստանից նոր աղմկահարույց հայտարարություն՝ Հայկական ծիրանը կարելի է փոխարինել

Հայկական ծիրանը կարելի է փոխարինել՝ ավելացնելով ներմուծումները Թուրքիայից, Ուզբեկստանից և Տաջիկստանից, իսկ քաղցր բալը՝ Ուզբեկստանից, Ադրբեջանից, Թուրքիայից և Մոլդովայից։ Այս մասին «ՏԱՍՍ»-ին հայտնել է   «Руспродсоюз»-ի վարչության նախագահի տեղակալ Դմիտրի Լեոնովը։

Ավելի վաղ Россельхознадзор-ը հայտնել էր, որ 2026 թվականի հունիսի 2-ից ժամանակավոր սահմանափակումներ են մտցվում Հայաստանից կեռասի, քաղցր բալի, ծիրանի, սալորի, դեղձի, նեկտարինի և խաղողի ներմուծման վրա։

«Ներմուծողները կկարողանան մեծացնել մատակարարումներն այլընտրանքային երկրներից, քանի որ գործող լոգիստիկ սխեմաներն արդեն հարմարեցված են տարբեր մատակարարների միջև արագ անցում կատարելու համար»,- նշել է Լեոնովը։

Նրա խոսքով՝ հայկական խաղողը կարելի է փոխարինել Թուրքիայից, Ուզբեկստանից, Եգիպտոսից, Հնդկաստանից և Չինաստանից ներմուծվող խաղողով, կեռասը՝ Սերբիայից և Մոլդովայից, նեկտարինը՝ Թուրքիայից, Ուզբեկստանից, Եգիպտոսից, Հնդկաստանից և Չինաստանից, իսկ դեղձը՝ Թուրքիայից, Ադրբեջանից, Ուզբեկստանից և Վրաստանից ներմուծվող մատակարարումներով։

Նա նաև նշել է, որ հայկական մրգերն ու կորիզավոր պտուղները ռուսական ներմուծման մեջ զբաղեցնում են փոքր բաժին. «Հետևաբար դրանց ներմուծման սահմանափակումը էական ազդեցություն չի ունենա մատակարարումների ընդհանուր ծավալի վրա»,-հավելել է փորձագետը։

«Ռուսաստանի մրգաբանջարեղենային շուկան ունի բարձր աստիճանի դիվերսիֆիկացում, ինչը թույլ է տալիս արագ հարմարվել տեսականու ցանկացած փոփոխության»,- ընդգծել է նա։