Ռուսաստանի պաշտոնական արձագանքը՝ ներմուծման նոր սահմանափակումների վերաբերյալ

ԵԱՏՄ երկրներից Ռուսաստան ապրանքների ներմուծման նոր կանոնները նպատակ ունեն կրճատել մոխրագույն ներմուծումը, ինչը կբարձրացնի Ռուսաստանի բյուջեի հարկային եկամուտները։ Այս կարծիքը «Վեստի» լրատվական գործակալության հետ կիսվել է Ռուսաստանի Դաշնության կառավարությանը կից Ֆինանսական համալսարանի պրոֆեսոր Ալեքսանդր Սաֆոնովը։

Նա ենթադրել է, որ նոր վերահսկողության միջոցառումները կարող են լինել Ֆինանսների նախարարության կողմից 50 միլիարդ ռուբլի լրացուցիչ հարկեր հավաքելու ռազմավարության մի մասը։

«Ներմուծման նոր կանոնների ներդրումը հավանաբար փորձ է իրականացնելու Ֆինանսների նախարարության կողմից սահմանված նպատակը՝ մինչև տարեվերջ հավաքել 50 միլիարդ ռուբլի լրացուցիչ հարկեր ԱԱՀ-ի և մաքսային տուրքերի տեսքով, քանի որ համակարգն ինքնին ուղղված է այսպես կոչված մոխրագույն անվերահսկելի ներմուծման կրճատմանը»,- նշել է  Սաֆոնովը։ 

Ավելի վաղ Ռուսաստանի տնտեսական զարգացման նախարար Մաքսիմ Ռեշետնիկովը հայտարարել էր, որ ԵԱՏՄ անդամ երկրների միջև փոխադարձ առևտրաշրջանառությունն աճել է 6%-ով։ Նա հավելել է, որ այդ ցուցանիշը 2026 թվականի առաջին եռամսյակում հասել է 22 միլիարդ դոլարի։