Զելենսկին հրամանագիր է ստորագրել․ որ երկրներն են հայտնվել սև ցուցակում

Ուկրաինայի նախագահ Վլադիմիր Զելենսկին վավերացրել է նոր պատժամիջոցների փաթեթներ, որոնք համապատասխանեցված են Եվրոպական միության սահմանած սահմանափակումների 20-րդ ալիքին։ Որոշման թիրախում են հայտնվել ռազմական, տեխնոլոգիական և պաշտպանական ոլորտներին առնչվող տասնյակ ֆիզիկական ու իրավաբանական անձինք։

Սահմանված նոր արգելքների ցանկում ընդգրկվել են Ռուսաստանի 16 քաղաքացիներ և 31 կազմակերպություններ։ Ընկերությունների աշխարհագրությունը բավականին ընդարձակ է. բացի ՌԴ-ից, ցուցակում ներառված են Բելառուսում, Արաբական Միացյալ Էմիրություններում, Ղրղզստանում, Ղազախստանում ու Ուզբեկստանում գրանցված ձեռնարկություններ, ինչպես նաև Ուկրաինայի՝ ներկայումս ռուսական վերահսկողության տակ գտնվող տարածքներում գործող սուբյեկտներ։

Տնտեսական և իրավական սահմանափակումները հիմնականում ուղղված են ռուսական ռազմարդյունաբերական համալիրի, ռադիոէլեկտրոնային պայքարի միջոցներ արտադրողների, ծրագրային ապահովմամբ զբաղվողների, ինչպես նաև անօդաչու թռչող սարքերի բաղադրիչներ պատրաստող գործարանների ու դրանց ղեկավարների դեմ։

Առանձին հրամանագրերով պատժամիջոցներ են կիրառվել նաև Իրանի 19 ու Սուդանի 7 քաղաքացիների նկատմամբ։ Բացի այդ, սև ցուցակում են հայտնվել իրանական 11 ընկերություններ, որոնք, ըստ ուկրաինական կողմի, անմիջական կապ ունեն բալիստիկ հրթիռների և ԱԹՍ-ների մշակման ու արտադրության ծրագրերի հետ։