Ռուս-հայկական հարաբերություններում նոր ազդակ․ Աստանայից հնչեց հստակ ուղերձ՝ ԵԱՏՄ-ի վերաբերյալ

«Ժողովուրդ» օրաթերթը գրում է.  Հայաստան-Ռուսաստան հարաբերություններում պահպանվող լարվածության և Հայաստանի արտաքին քաղաքական առաջնահերթությունների շուրջ շարունակվող քննարկումների ֆոնին, ՀՀ փոխվարչապետ, վարչապետի պաշտոնակատարի տեղակալ Մհեր Գրիգորյանը մասնակցել է Աստանայում կայացած Եվրասիական միջկառավարական խորհրդի նիստին և Հայաստանի անունից հստակ ուղերձներ փոխանցեց ԵԱՏՄ գործընկերներին։

Գրիգորյանի ելույթը, ըստ էության, կարելի է գնահատել որպես Երևանի կողմից իրավիճակը հանդարտեցնելու և գործընկերներին վստահեցնելու փորձ, որ Հայաստանը մոտ ապագայում չի պատրաստվում կտրուկ քայլերի գնալ ԵԱՏՄ անդամակցության հարցում։ Այսպիսով, Հայաստանի՝ միությունից դուրս գալու կամ անդամակցությունը վերանայելու թեման փաստացի հետաձգվել է առնվազն մինչև տարեվերջ։

«Մենք բազմիցս վերահաստատել ենք Հայաստանի հավատարմությունը Եվրասիական տնտեսական միության շրջանակներում փոխշահավետ համագործակցությանը՝ ի շահ մեր երկրների և ընդհանուր առմամբ մեր տարածաշրջանի տնտեսական կայունության ու տնտեսական զարգացման կայունության ապահովման։ Հայաստանի Հանրապետությունը մտադիր է նաև ապագայում բարեխղճորեն մասնակցել միության աշխատանքներին՝ փոխադարձ հարգանքի, իրավահավասար գործընկերության և ԵԱՏՄ անդամ բոլոր պետությունների ազգային շահերը հաշվի առնելու հիման վրա»,- հայտարարել է Մհեր Գրիգորյանը։

Քաղաքական շրջանակներում ուշադրություն են հրավիրում այն հանգամանքի վրա, որ պաշտոնական Երևանը, առնվազն այս փուլում, խուսափում է ԵԱՏՄ-ից դուրս գալու վերաբերյալ հստակ հայտարարություններից։ Ավելին, Հայաստանի եվրոպական ինտեգրման հեռանկարների շուրջ հնչող քաղաքական գնահատականների ֆոնին իշխանությունը շարունակում է պահպանել տնտեսական համագործակցության գործող ձևաչափերը՝ հասկանալով, որ ԵԱՏՄ-ից արագ ու առանց ծանր հետևանքների դուրս գալու սցենարը գործնականում իրատեսական չէ։
Այս իմաստով Աստանայում Մհեր Գրիգորյանի հնչեցրած ուղերձները կարելի է դիտարկել որպես ժամանակ շահելու և հարաբերություններում լրացուցիչ սրացումներից խուսափելու քայլ՝ առնվազն մինչև Հայաստանի իշխանությունները վերջնականորեն հստակեցնեն իրենց հետագա արտաքին-քաղաքական հաշվարկները։

Մանրամասները՝ սկզբնաղբյուրում։