ՍԱՏՄ-ի արձագանքը` ՌԴ-ի կողմից մի շարք գյուղմթերքների ներմուծման սահմնափակումներին

Հայաստանի սննդի անվտանգության տեսչական մարմինը մայիսի 28-ին ծանուցում է ստացել Ռուսաստանի Դաշնության կողմից սահմանվող սահմանափակումների մասին։

ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը Auroranews-ին հայտնեց․ «Ստացել ենք ծանուցում, որ մայիսի 30-ից ժամանակավորապես սահմանափակումներ են գործելու Հայաստանից արտահանվող լոլիկի, վարունգի, պղպեղի, կանաչեղենի ու ելակի ներկրման նկատմամբ։ Տեսչական մարմնի ղեկավարն արդեն սկսել է բանակցությունները»։ Նա նաև նշել է, որ արդյունքները հայտնի կդառնան ու կհրապարակվեն առաջիկա մեկ շաբաթվա ընթացքում։

Ռոսսելխոզնադզորը հայտարարել է մայիսի 30-ից հայկական մի շարք գյուղմթերքների՝ լոլիկի, վարունգի, պղպեղի, կանաչեղենի և ելակի ներմուծման նկատմամբ ժամանակավոր սահմանափակումներ մտցնելու մասին։ Ռուսական կողմի փոխանցմամբ՝ որոշման պատճառը բուսասանիտարական խախտումների հաճախակի արձանագրումն է և հայկական կողմից նախկինում հայտնաբերված խնդիրների ուղղությամբ անբավարար միջոցներ ձեռնարկելը։ Ռոսսելխոզնադզորի տվյալներով՝ միայն 2026 թվականին արձանագրվել է խախտման 181 դեպք։