Թրամփը չի շտապում Իրանի հետ գործարքի հարցում

ԱՄՆ նախագահ Դոնալդ Թրամփը չի ակնկալում Թեհրանի հետ համաձայնագրի արագ ստորագրում։ ԱՄՆ նախագահը Truth Social-ում գրել է, որ բանակցությունները ընթանում են «կարգավորված և կառուցողական» մթնոլորտում, սակայն իր ներկայացուցիչներին հանձնարարել է չշտապել գործարքի կնքման հարցում։

«Ժամանակը մեր կողմն է։ Սխալներ չպետք է լինեն»,- հայտարարել է Թրամփը։

Ամերիկյան լրատվամիջոցների տվյալներով՝ Իրանի ղեկավարության կողմից դիրքորոշման համաձայնեցումը կարող է տևել մի քանի օր, իսկ հիմնական վիճահարույց հարցը շարունակում է մնալ միջուկային ծրագիրը։ Ենթադրվող համաձայնագիրը պետք է ներառի նաև Հորմուզի նեղուցի բացումը և բարձր հարստացված ուրանի դուրսբերումը կամ ոչնչացումը։

Միաժամանակ ԱՄՆ պետքարտուղար Մարկո Ռուբիոն չի բացառել, որ համաձայնությունը կարող է ձեռք բերվել արդեն մոտ ապագայում, սակայն ընդգծել է, որ այն պետք է հաշվի առնի Իսրայելի ինքնապաշտպանության իրավունքը։

Իրանը հրապարակայնորեն չի մեկնաբանել հնարավոր գործարքի մանրամասները։ Նախագահ Մասուդ Փեզեշքիանը միայն Irna գործակալությանը հայտարարել է, որ երկրի «պատվի և արժանապատվության» հարցերում Թեհրանը փոխզիջումների չի գնա։