ՏԵՍԱՆՅՈՒԹ. Արփինե Սարգսյանը` խոսել է վիզաներ ազատականացման մասին

Եվրամիության երկրների դեսպանատներում հաճախացել են Հայաստանի քաղաքացիների՝ շենգենյան վիզա ստանալու դիմումների, այդ թվում՝ բազմակի մուտքի վիզաների, հաստատման դեպքերը։ Այս մասին մայիսի 20-ին լրագրողների հետ հանդիպման ժամանակ հայտարարել է Հայաստանի ներքին գործերի նախարար Արփինե Սարգսյանը՝ ԵՄ-ի հետ վիզային ռեժիմի ազատականացման գործողությունների ծրագրի կատարման հաշվետվության ներկայացման ընթացքում։

Հակառակի մասին խոսակցությունները նա անվանել է ապատեղեկատվություն։ «Միաժամանակ կան հերթերի հետ կապված բողոքներ, և դեսպանատները աշխատում են այս խնդրի լուծման համար իրենց հնարավորություններն ընդլայնելու ուղղությամբ»,- հավելել է նա։

Նախարարը հայտնել է, որ 2019 թվականին Հայաստանի քաղաքացիներին տրվել է 51 հազար շենգենյան վիզա (այդ թվի 34,8%-ը եղել են բազմակի սահմանահատման վիզաներ), իսկ 2024 թվականին՝ 86 300 (այդ թվի 43,5%-ը եղել են բազմակի սահմանահատման վիզաներ)։

Նրա խոսքով՝ 2019 թվականին վիզաների մերժումների բաժինը կազմել է 13,2%, իսկ 2024 թվականին՝ 12,4%։