Նվեր Ծառուկյանի թեման թեժացնում է քաղաքական դաշտը․ ԲՀԿ-ն մեղադրում է Փաշինյանին

Սա անմեղության կանխավարկածի խախտում է: Նման հայտարարություն է արել ԲՀԿ խոսնակ Իվետա Տոնոյանը՝ մեկնաբանելով Գագիկ Ծառուկյանի որդու վերաբերյալ վարչապետ Փաշինյանի հայտարարությունը: 

«Փաշինյանը Ծառուկյանի որդու գործով իրեն վերապահում է դատավճիռ կայացնելու գործառույթ, ցավալի է»,- նշել է նա:

Ավելի վաղ վարչապետ Փաշինյանը հայտարարել էր Բելառուսից Նվեր Ծառուկյանին վտարելու և Հայաստանում ձերբակալելու մասին:

Գագիկ Ծառուկյանն էլ անընդունելի էր համարել ընտանիքի թեման քաղաքական գործընթացներին խառնելը՝ նշելով՝ Նվեր Ծառուկյանը Հայաստան կվերադառնա հունիսի 7-ից հետո, և բոլոր հարցերը հնարավոր կլինի ուղղել անձամբ նրան։ 

Հիշեցնենք՝ Գագիկ Ծառուկյանի որդին՝ Նվեր Ծառուկյանը հետախուզման մեջ է: «Բարգավաճ Հայաստան»-ի առաջնորդի որդին ու մյուսները մեղադրվում են մոտ մեկ ամիս առաջ Ծաղկաձորի խաղատներից մեկում տեղի ունեցած միջադեպի գործով: Ոչ փաստաբանը, ոչ էլ իրավապահները չեն մանրամասնում, թե կոնկրետ ինչ է եղել, բայց Քննչական կոմիտեի խոսնակը հաստատում է՝ դեպքի վայրում կրակոցներ էին հնչել։