Իրենք չտեսի նման եկան իշխանության, քաոս են ստեղծում. Սամվել Կարապետյան

Իրենց իշխանությունը պահելու համար ստեղծում են քաոս, որ կարողանան կառավարել այդ քաոսը: Այս մասին Նազենի Հովհաննիսյանի «Կամուրջներ» հաղորդաշարին տված հարցազրույցում ասել է «Ուժեղ Հայաստան» կուսակցության առաջնորդ Սամվել Կարապետյանը:

«Իրենք չտեսի նման եկան իշխանության, չտես մարդուց ավելի ագահ մարդ գոյություն չունի: Այս մարդիկ այդ սկզբունքով են շարժվում առաջ, ագահությունը խեղդում է իրենց, իրենք չեն պատկերացնում այս կյանքն առանց իրենց իշխանության ու աթոռների: Մենք չենք կարող թույլ տալ իշխանության բերել մարդկանց, որոնք միայն «ի հեճուկս» բառը գիտեն: 

Նա իշխանության է եկել ընդամենը մեկ բառով՝ «ի հեճուկս», բայց երկիր կառավարելու համար միայն հակառակվելը բավարար չէ, պետք է ունենալ տվյալներ, որոնք այս իշխանությունը չունի: Նիկոլ Փաշինյանի առավելագույն պոտենցիալը կարող էր լինել Ենոքավանում մի խոզաբուծարան կառավարելը։ Այս մարդիկ կորցրել են կապը իրականության հետ, նրանք չեն հանգստանալու և գնալու են նորանոր միակողմանի զիջումների, ինչը կործանարար է մեր պետականության համար»,- նշել է Կարապետյանը:

Սամվել Կարապետյանը Նազենի Հովհաննիսյանի հետ զրույցում ահազանգել է սպասվող նոր վտանգների մասին։ Ըստ նրա՝ իշխանությունները կորցրել են սթափության զգացումն ու կապը սեփական ժողովրդի հետ, ինչի արդյունքում երկիրը տանում են նորանոր միակողմանի զիջումների՝ վտանգելով Հայաստանի անվտանգային ողջ համակարգը։