Առցանց սեռական շահագործում Հայաստանում. մտահոգիչ ցուցանիշներ

ՅՈՒՆԻՍԵՖ-ը «Վնասի կանխարգելումը Հայաստանում» թեմայով մի ուսումնասիրություն է արել, որի տվյալները շատ մտահոգիչ են: Այդ մասին ՀՀ կրթության, գիտության, մշակույթի և սպորտի նախարարին կից հասարակական խորհրդի նիստի ժամանակ ասաց նախարարի տեղակալ Արաքսիա Սվաջյանը՝ ներկայացնելով ՅՈՒՆԻՍԵՖ-ի զեկույցից ցուցանիշներ:

«Այսպիսի մի արդյունք է գրանցվել, որ 12-17 տարեկան յուրաքանչյուր 20-րդ երեխան, որն ինտերնետ է օգտագործում, 1 տարվա ընթացքում ենթարկվել է առցանց սեռական շահագործման կամ բռնության: Դեպքերի 71 տոկոսը տեղի է ունեցել ամբողջությամբ առցանց միջավայրում, իսկ 57 տոկոսի դեպքում երեխաները նշել են, որ իրենց ծանոթ մարդկանց կողմից է իրականացվել:

Այս ցուցանիշները բավականին բարձր ու մտահոգիչ ցուցանիշներ են: Հետազոտության մասնակցած և բռնության ենթարկվելու մասին հայտնած երեխաների 53 տոկոսը նշել է, որ որևէ մեկին երբևէ չի հայտնել այս դեպքի մասին և ընդհանրապես չի բարձրաձայնել, այսինքն՝ ինքն իր հետ է մնացել այս իրավիճակում:

Բնականաբար, այս դեպքում երեխաներ կան, որ ուժ գտնում են դուրս գալու այս իրավիճակից, կարողանում են ինքնուրույն լուծումներ գտնել, բայց մենք հաճախ ունենում ենք իրավիճակներ, երբ երեխան շատ վատ տրանադրություն է ունենում, ուսման նկատմամբ մոտիվացիան է ընկնում, մեկուսանում է և այլն, և դրա պատճառը որևէ մեկը չի հասկանում, մինչդեռ հաճախ սրանք կարող են նմանատիպ իրավիճակներից բխող խնդիր լինել»,- ասաց նա:

Նախարարի տեղակալը ներկայացրեց նաև թեմայի շրջանակում միջազգային որոշ ցուցանիշներ. օրինակ, կա ցուցանիշ, ըստ որի՝ 1 տարվա ընթացքում շուրջ 1,2 մլն երեխա deepfake տեխնոլոգիաներով ստեղծված սեռական բնույթի կեղծ բովանդակության զոհ է դառնում: