Հանտավիրուսը հասավ Նիդրլանդներ. 12 բուժաշխատողներ են մեկուսացվել

Նեյմեգենի Radboudumc համալսարանական բժշկական կենտրոնի տասներկու աշխատակիցներ տեղավորվել են կանխարգելիչ կարանտինի մեջ՝ հանտավիրուսով վարակված պացիենտի նմուշառման ժամանակ սահմանված խիստ կանոնները չպահպանելու պատճառով։

Հիվանդանոցի երկուշաբթի երեկոյան տարածած հայտարարության համաձայն՝ անձնակազմը MV Hondius լայներից տարհանված հիվանդի արյան նմուշառման ընթացքում կիրառել է ստանդարտ ընթացակարգ՝ անտեսելով վիրուսի բնույթով պայմանավորված ավելի խիստ արձանագրությունը։ Բացի այդ, միջազգային կանոններին չհամապատասխանող ձևով է իրականացվել նաև պացիենտի մեզի ուտիլիզացումը։ Բժշկական կենտրոնը նշել է, որ չնայած վարակման հավանականությունը ցածր է, բուժաշխատողները վեց շաբաթ կմնան մեկուսացման մեջ։ Կարանտինում է գտնվում նաև հանտավիրուսով վարակված հիվանդը։

Radboudumc-ի վարչության նախագահ Բերտինա Լահեյսը ցավ հայտնելով կատարվածի համար՝ վստահեցրել է, որ միջադեպը մանրակրկիտ կուսումնասիրվի՝ հետագայում նման սխալներից խուսափելու համար։

Միևնույն ժամանակ, MV Hondius զբոսանավը, որը նավարկում է Նիդեռլանդների դրոշի ներքո, սկսել է վերադարձը դեպի Ռոտերդամ։ Տարհանման լայնածավալ գործողության շրջանակում վերջին 28 ուղևորները, այդ թվում՝ Ֆիլիպինների, Նիդեռլանդների և Գերմանիայի քաղաքացիներ, բժիշկ և համաճարակաբաններ, հատուկ չվերթներով հասել են Էյնդհովենի օդանավակայան։

Առողջապահության համաշխարհային կազմակերպության տվյալներով՝ տարհանվածներից առնվազն յոթի մոտ հանտավիրուսի թեստը դրական է եղել։ Կրծողների միջոցով տարածվող այս հազվագյուտ վիրուսը զբոսանավում երեք մարդու մահվան պատճառ է դարձել։ Թեև վիրուսի դեմ պատվաստանյութ կամ հատուկ բուժում չկա, մասնագետները նշում են, որ հանրության համար վտանգը մեծ չէ և այն չի կարող համեմատվել COVID-19-ի հետ։ Սպասվում է, որ լայները Ռոտերդամ կհասնի կիրակի, որից հետո նավում կիրականացվի դեզինֆեկցիա։