Նոր մանրամասներ «Արբատ» գումարտակի հիմնադիր Արմեն Սարգսյանի աղմկահարույց սպանությունից

Մոսկվայում «Արբատ» գումարտակի հիմնադիր Արմեն Սարգսյանի սպանության հետևում կանգնած են եղել Ուկրաինայի անվտանգության ծառայության (ՈՒԱԾ) և ռազմական հետախուզության աշխատակիցների թվից չպարզված անձինք, «ՌԻԱ Նովոստի»-ին հայտնել են ՌԴ Քննչական կոմիտեից։

«Քննությամբ պարզվել է, որ ոչ ուշ, քան 2024 թվականի մարտին, Ուկրաինայի ՈՒԱԾ-ի և պաշտպանության նախարարության գլխավոր հետախուզական վարչության աշխատակիցների թվից չպարզված անձինք Մոսկվայի տարածքում ահաբեկչական ակտ իրականացնելու ծրագիր են մշակել։ Որպես թիրախ է ընտրվել հասարակական գործիչ Արմեն Սարգսյանը, ով հանդես էր գալիս 2014 թվականի փետրվարին Ուկրաինայում տեղի ունեցած պետական հեղաշրջման դեմ»,- ասվում է հաղորդագրության մեջ։

Նշվում է, որ հանցագործությունը կատարելու համար ձևավորվել է խումբ, որի մեջ մտել են Վարաժ Մանուկյանը, Պարույր Մաթևոսյանը և այլ անձինք։ Հանցակիցները հետևել են տուժողին, ուսումնասիրել նրա երթուղիներն ու պահպանությունը, ինչպես նաև տեսանկարահանումներ իրականացրել։

Մանուկյանն ապահովել է ՄՕՆ-50 ականի և այլ բաղադրիչների հիման վրա պատրաստված ինքնաշեն պայթուցիկ սարքի փոխադրումն ու պահպանումը։ 2025 թվականի փետրվարի 3-ին Մաթևոսյանը հայտնել է տուժողի մոտենալու մասին, որից հետո հանցակիցը հեռակառավարմամբ գործի է դրել պայթուցիկ սարքը։

«Պայթյունի հետևանքով Արմեն Սարգսյանը և հանցագործության կատարող Պարույր Մաթևոսյանը տեղում մահացել են։ Առողջությանը ծանր վնաս է հասցվել երկու տուժողի, ևս մեկին՝ միջին ծանրության վնաս։ Բացի այդ, զգալի գույքային վնաս է հասցվել բնակելի համալիրի կառավարող ընկերությանը»,- հավելել են Քննչական կոմիտեում։

2025 թվականի փետրվարի 3-ի առավոտյան Ավիացիոն փողոցի «Ալիե պարուսա» բնակելի համալիրում գործի է դրվել պայթուցիկ սարք, որը տեղադրված է եղել բարձրահարկ շենքի վերելակային սրահում։ Սկզբնապես հաղորդվում էր մեկ զոհի մասին, ևս չորսին ծանր վիճակում տեղափոխել էին հիվանդանոցներ։ Ինչպես հետագայում հստակեցրել է Ռուսաստանի ՔԿ Մոսկվայի գլխավոր վարչությունը, տուժածներից մեկը մահացել է բժշկական հաստատությունում։ Նա Դոնբասի կամավորական գումարտակի հիմնադիր Արմեն Սարգսյանն էր։ Վարկածներից մեկի համաձայն՝ պայթյունը կարող էր իրականացնել մահապարտը։

Հարուցվել է քրեական գործ «Հանցագործության նախապատրաստում և հանցափորձ», «Սպանություն» և «Պայթուցիկ նյութերի կամ պայթուցիկ սարքերի ապօրինի շրջանառություն» հոդվածներով։