Իրանի նոր օրինագիծը կարող է ցնցել նավթի համաշխարհային շուկան

Իրանի խորհրդարանի Ազգային անվտանգության և արտաքին քաղաքականության հանձնաժողովն ավարտել է Հորմուզի նեղուցի կառավարման վերաբերյալ նոր օրինագծի մշակման աշխատանքները։ Փաստաթուղթն արդեն ստացել է մասնագիտական հանձնաժողովի վերջնական եզրակացությունը և ներկայացվել է խորհրդարանի քննարկմանը։ Հանձնաժողովի նախագահ Էբրահիմ Ազիզին տեղեկացրել է, որ նախագիծն արդեն ներբեռնված է օրենսդիր մարմնի համակարգ՝ հաստատման գործընթացն անցնելու նպատակով։

Իրանի պետական լրատվամիջոցները հաղորդում են, որ այս նախաձեռնությունը դիտարկվում է որպես ռազմավարական հնարավորությունների ընդլայնման գործիք։ Իրանական կողմի համոզմամբ՝ Հորմուզի նեղուցը կարևորագույն աշխարհագրական ներուժ է, որը կարող է ծառայել որպես «ճնշման գործիք»՝ միջազգային և տարածաշրջանային հարթակներում սեփական շահերը պաշտպանելու համար։

Հավելենք՝ Հորմուզի նեղուցը համաշխարհային նավթային առևտրի առանցքային հանգույցներից է, և դրա կառավարման կանոնների փոփոխությունը կարող է էական ազդեցություն ունենալ միջազգային բեռնափոխադրումների անվտանգության վրա։ Կոնկրետ մեխանիզմները, որոնցով Իրանը պատրաստվում է իրականացնել նեղուցի նորացված կառավարումը, պարզ կդառնան օրինագծի վերջնական ընդունումից հետո։