Ֆրանսիայի քաղաքական դաշտում նոր լարվածություն․ Լը Պենը մարտահրավեր է նետում դատարանին

Ֆրանսիական «Ազգային միավորում» աջակողմյան կուսակցության խորհրդարանական խմբակցության ղեկավար Մարին Լը Պենը հայտարարել է, որ մտադիր է առաջադրել իր թեկնածությունը առաջիկա նախագահական ընտրություններում նույնիսկ այն դեպքում, եթե Վերաքննիչ դատարանը ուժի մեջ թողնի իրեն ընտրվելու իրավունքից զրկող որոշումը՝ պայմանական պատժաչափի տեսքով։ RTL ռադիոկայանի եթերում քաղաքական գործիչը շեշտել է, որ օգտագործելու է իրավական պաշտպանության բոլոր հնարավոր միջոցները՝ պայքարը շարունակելու համար։

2025 թվականի մարտի 31-ին առաջին ատյանի դատարանը Լը Պենին մեղավոր էր ճանաչել և դատապարտել չորս տարվա ազատազրկման (որից երկուսը՝ պայմանական), ինչպես նաև հինգ տարով զրկել ընտրովի պաշտոններ զբաղեցնելու իրավունքից։ Այս արգելքն ուժի մեջ է մտել անմիջապես, ինչն էլ վտանգի տակ է դնում նրա մասնակցությունը 2027 թվականի ընտրարշավին։

Փարիզի Վերաքննիչ դատարանը բողոքարկման վերաբերյալ իր վերջնական որոշումը պետք է հրապարակի հուլիսի 7-ին։ Եթե դատարանը չբեկանի ընտրվելու իրավունքի սահմանափակումը, Լը Պենը ստիպված կլինի դուրս գալ պայքարից։ Հիշեցնենք, որ Ֆրանսիայի նախագահական ընտրությունների առաջին փուլը նախատեսված է 2027 թվականի ապրիլին, իսկ գործող նախագահ Էմանուել Մակրոնն այլևս չի կարող առաջադրվել սահմանադրական սահմանափակումների պատճառով։