Ամեն ինչ որոշվում էր ուժով․ Լավրովը նախազգուշացնում է

Աշխարհը վերադառնում է այն ժամանակներին, երբ ամեն ինչ որոշվում էր ուժով և առանց միջազգային իրավունքի հարգանքի, RT India-ին տված հարցազրույցում  հայտարարել է Ռուսաստանի արտաքին գործերի նախարար Սերգեյ Լավրովը։

«Մենք վերադառնում ենք այն օրերին, երբ ամեն ինչ որոշվում էր ուժով, երբ ոչ ոք չէր ճանաչում որևէ միջազգային իրավունք։  ԱՄՆ նախագահ Դոնալդ Թրամփը վերջերս հայտարարեց, որ ինքը որևէ հետաքրքրություն չունի միջազգային իրավունքի նկատմամբ», - ասել է ռուս դիվանագետը։ 

Ըստ Լավրովի՝ ներկայիս աշխարհում առավել մեծ նշանակություն ունեն ոչ թե հայտարարությունները, այլ կոնկրետ գործողությունները։ Նա մասնավորապես նշել է ԱՄՆ-ի օրինակը՝ ընդգծելով, որ անհրաժեշտ է հետևել իրական քայլերին, այլ ոչ թե միայն խոսքերին, քանի որ վերջիններս հաճախ չեն համապատասխանում իրական քաղաքականությանը։

Որպես իրավիճակի կառուցողական լուծում՝ ՌԴ արտգործնախարարը մատնանշել է ԲՐԻԿՍ-ի ձևաչափը։ Նրա ձևակերպմամբ՝ այս կառույցի նպատակը պետությունների միջև փոխադարձ հարգանքի վրա հիմնված հարաբերությունների զարգացումն ու շահերի հավասարակշռության որոնումն է։ Լավրովը շեշտել է, որ նման մոտեցումը չպետք է ընկալվի որպես պարզ այլընտրանք, այլ պետք է դառնա հիմնական օրակարգ՝ անտագոնիզմից և նոր հակամարտություններից խուսափելու համար։