Ալիևը նախազգուշացնում է Հայաստանին․ զգոն եղեք․ պատգամավոր

Ադրբեջանի Միլլի Մեջլիսի պատգամավոր Ռիզվան Նաբիևը հայտարարել է, որ Իլհամ Ալիևի՝  հնչեցրած մտքերը նախազգուշացում են Հայաստանի քաղաքական շրջանակներին։

Պատգամավորի խոսքով՝ Զանգիլանի բնակիչների հետ հանդիպման ժամանակ Իլհամ Ալիևի արված հայտարարությունները կարելի է համարել պետականության համար պայքարի ռազմավարական մանիֆեստ և նոր աշխարհաքաղաքական իրողությունների ցուցիչ։ Նաբիևը շեշտել է, որ ուղերձները կարևոր են թե՛ ժամանակի, թե՛ տարածության առումով։

Ըստ նրա՝ հունիսի 7-ի խորհրդարանական ընտրությունների նախաշեմին Ալիևի խոսքերը նախազգուշացում են Հայաստանի ռևանշիստների և արտաքին ուժերի համար՝ ընդգծելով Ադրբեջանի ռազմական ուժն ու պրագմատիկ քաղաքականությունը։

Բացի այդ, Ռիզվան Նաբիևը քննադատել է Ֆրանսիայի քաղաքականությունը՝ նշելով, որ Աֆրիկայում և Մերձավոր Արևելքում ազդեցությունը կորցրած Փարիզը փորձում է ներթափանցել Հարավային Կովկաս։ 

«ՀՀ կառավարությունն այժմ փորձում է փոխարինել երկրի վաղուց կատարած ֆորպոստային գործառույթը՝ դառնալով ֆրանսիական նեոգաղութատիրության հարթակ։ Չնայած Ֆրանսիայի նախագահը հայտարարել է, որ Հարավային Կովկասը չպետք է դառնա «կայսրությունների միջև մրցակցության ասպարեզ», նա Հայաստանում վարում է  ռազմականացման քաղաքականություն։ Զգոն եղեք, դեռ կա ժամանակ և հնարավորություն դասեր քաղելու պատմությունից, դադարեցնելու հովանավորների որոնումները և վարելու քաղաքականություն՝ համապատասխան Ադրբեջանի կողմից ստեղծված նոր քաղաքական իրողություններին»,- եզրափակել է պատգամավորը։