Ախալքալաքցի գործարարներին փորձում են բերել ՀՀ` Սամվել Կարապետյանի օգտին քվեարկելու համար. ԶԼՄ

Bagramyan26-ի տեղեկություններով՝ «կալուգացիները» ծրագրում են Ռուսաստանում խոշոր ռեսուրսներ հատկացնել ախալքալաքցի հայերին, որպեսզի նրանք ընտրությունների ընթացքում գան Հայաստան և քվեարկեն Սամվել Կարապետյանի օգտին։

Մասնավորապես, աղբյուրի հասած տեղեկությունների համաձայն՝ «Մոսկվայի հայ համայնքի նախագահ» Նորիկ Թևանյանը, Արա Աբրահամյանի հանձնարարությամբ, ապրիլի վերջին մոսկովյան ռեստորաններից մեկում բանկետի էր հրավիրել Ռուսաստանում գործունեություն ծավալող շուրջ 200 ախալքալաքցի հայ գործարարների։

Բանկետից հետո Թևանյանը առանձին հանդիպումներ է անցկացրել այդ գործարարների խմբերի հետ և հանձնարարել կազմակերպել, որպեսզի Հայաստանի Հանրապետության քաղաքացիություն ունեցող իրենց համագյուղացիները ընտրությունների օրերին ժամանեն Հայաստան և իրենց ձայները տան «Ուժեղ Հայաստան» կուսակցությանը։

Աղբյուրի տեղեկություններով՝ Ջավախքում լուրեր են պտտվում առ այն, որ Թևանյանի հանձնարարությամբ Ռուսաստանում բնակվող ախալքալաքցի հայ գործարարները պատրաստվում են իրենց համագյուղացիներին բաժանել նախընտրական կաշառք՝ յուրաքանչյուր անձի համար 100 դոլարի չափով։