Վրաստանից Հայաստան եկող գազատարի մի հատված կտեղափոխվի. մանրամասներ

Հայաստանի և Վրաստանի միջև գործող գազատարի 5,5-կիլոմետրանոց հատվածի տեղափոխման որոշումը պայմանավորված է խողովակաշարի տեխնիկական անբավարար վիճակով։

ՀՀ տարածքային կառավարման և ենթակառուցվածքների նախարարությունը, պատասխանելով Sputnik Արմենիայի հարցմանը, հայտնել է, որ աշխատանքների նպատակը հանրապետության հուսալի և անխափան գազամատակարարման ապահովումն է։ Ավելի վաղ վրացական կողմը տեղեկացրել էր, որ գազատարի նշված հատվածը տեղափոխվելու է հայկական կողմի խնդրանքով, իսկ ՀՀ վարչապետի աշխատակազմի ղեկավար Արայիկ Հարությունյանը նշել էր, որ դա կարող է կապված լինել երկու երկրների միջև սահմանազատման գործընթացի հետ։

Գերատեսչության փոխանցմամբ՝ այս մայրուղին ռազմավարական նշանակություն ունի, քանի որ դրանով է ստացվում Ռուսաստանից ներկրվող բնական գազի ավելի քան 80 տոկոսը։ Նոր կառուցվող հատվածը թույլ կտա նվազեցնել վթարների ու խափանումների ռիսկերը։ Նախարարությունից նաև վստահեցրել են, որ շինարարության ընթացքում Հայաստանում գազամատակարարման ընդհատումներ չեն լինի։

Գործընթացն արդեն մեկնարկել է և պետք է ավարտվի մինչև 2027 թվականի վերջը։ Նախագիծն իրականացվում և ֆինանսավորվում է վրացական կողմի միջոցներով։ Հարցը նախապես համաձայնեցվել է Հայաստանի և Վրաստանի տնտեսական համագործակցության միջկառավարական հանձնաժողովի շրջանակում։