Պուտինը ձախողել է․ Մոսկվայում մայիսի 9-ի զորահանդեսը ցույց տվեց նրա թուլությունը. Էստոնիայի ԱԳՆ

Մոսկվայի Կարմիր հրապարակում մայիսի 9-ին կայացած ռազմական շքերթն արժանացել է Էստոնիայի արտաքին գործերի նախարարության քննադատությանը։ Գերատեսչության կանցլեր Յոնատան Վսևիովի դիտարկմամբ՝ միջոցառումը թողել է ընդհանուր անկման և հոգնածության տպավորություն։ Ըստ նրա՝ ներկայացված պատկերը վկայում է Ռուսաստանի ներկայիս քաղաքական և ռազմական իրավիճակի մասին։

Էստոնացի պաշտոնյան ուշադրություն է հրավիրել շքերթին ներգրավված ռազմական տեխնիկայի սակավության վրա։ Նրա պնդմամբ՝ զրահատեխնիկայի և այլ սպառազինության բացակայությունն ուղղակիորեն կապված է Ուկրաինայում ընթացող պատերազմի հետ, որտեղ ռուսական կողմը զգալի կորուստներ է կրել։ Վսևիովը հավելել է նաև, որ Ռուսաստանը հավանաբար նպատակահարմար չի համարել մնացած տեխնիկան կենտրոնացնել մեկ վայրում։

Բացի մոսկովյան իրադարձություններից, Էստոնիայի ԱԳՆ ներկայացուցիչն անդրադարձել է նաև Նարվայի սահմանակից Իվանգորոդում կազմակերպված տոնական համերգին։ Դիվանագետի գնահատմամբ՝ սահմանի անմիջական հարևանությամբ նման միջոցառումների անցկացումը ձախողված փորձ է՝ էստոնական հասարակության մեջ պառակտում և անհանգստություն հրահրելու համար։