Եռօրյա հրադադարը խախտվեց․ Զելենսկին նախազգուշացնում է՝ պատասխանը կլինի շատ ցավոտ

Ռուսաստանի պաշտպանության նախարարությունը հայտարարել է, որ ուկրաինական զինուժը չի պահպանում ԱՄՆ նախագահ Դոնալդ Թրամփի միջնորդությամբ մայիսի 9-ից 11-ը հայտարարված հրադադարը։ Ըստ ռուսական կողմի պաշտոնական տվյալների՝ վերջին մեկ օրվա ընթացքում արձանագրվել են հազարավոր հարվածներ անօդաչու թռչող սարքերի և հրետանու կիրառմամբ։ Թիրախների թվում նշվում են ինչպես առաջնագծի դիրքերը, այնպես էլ ՌԴ սահմանամերձ շրջանների՝ Բելգորոդի, Կուրսկի, Կալուգայի, Ռոստովի մարզերի և Ղրիմի քաղաքացիական օբյեկտները։ Մոսկվան շեշտում է, որ ռուսական զորքերն իրականացնում են միայն «հայելային» գործողություններ՝ պատասխան հարվածներ հասցնելով հակառակորդի կրակակետերին։

Կիևն իր հերթին հերքում է լռության ռեժիմի պահպանումը ռուսական զինուժի կողմից։ Ուկրաինայի Զինված ուժերի գլխավոր շտաբի հաղորդմամբ՝ մայիսի 10-ին ճակատային գծում տեղի է ունեցել շուրջ 144 մարտական բախում։ Ուկրաինական կողմը պնդում է, որ Ռուսաստանը կիրառել է ավելի քան 5 հազար կամիկաձե-դրոն և բազմաթիվ անգամներ հրետակոծել է բնակավայրերն ու դիրքերը։ Հիմնական մարտերը շարունակվել են Կուպյանսկի, Կոնստանտինովկայի և Պոկրովսկի ուղղություններով։

Նախագահ Վլադիմիր Զելենսկին, անդրադառնալով իրավիճակին, նշել է, որ թեև մայիսի 9-ին և 10-ին զերծ են մնացել հեռահար հարվածներից՝ հաշվի առնելով ռուսական կողմից մասսայական հրթիռային գրոհների բացակայությունը, սակայն շփման գծում իրավիճակը մնում է լարված։ Նա ընդգծել է, որ ճակատում «լռության ռեժիմ» չի գործում, և ուկրաինական ստորաբաժանումները պատասխանում են հակառակորդի գործողություններին։ Զելենսկին նաև նախազգուշացրել է, որ հրադադարի ավարտից հետո լայնածավալ ռազմական գործողությունների վերսկսման դեպքում Ուկրաինայի պատասխանը լինելու է՝ շատ ցավոտ, անհապաղ և զգալի։