ԱԺ-ն ընդունեց նախագիծը. թմրամիջոց պահելու, արտադրելու, իրացնելու համար պատիժները կխստացվեն

65 կողմ, 0 դեմ, 8 ձեռնպահ ձայներով ԱԺ-ն երկրորդ ընթերցմամբ ու ամբողջությամբ ընդունեց թմրամիջոց պահելու, արտադրելու, իրացնելու պատիժները խստացնելու «Քաղաքացիական պայմանագիր» խմբակցության պատգամավոր Հայկ Սարգսյանի նախագիծը: 

Ըստ նախագծի՝ 
 
 «Խոշոր չափերով կամ տեղեկատվական տեխնոլոգիաների միջոցով թմրամիջոց իրացնելու դեպքում կսահմանվի մինչև 10 տարվա պատիժ:

 Առանձնապես խոշոր չափերով կամ անչափահասի ներգրավմամբ կամ անչափահասի՝ թմրամիջոց իրացնելու դեպքում կսահմանվի մինչև 15 տարվա պատիժ: Տելեգրամ ալիքի միջոցով թմրամիջոց իրացնելու համար կսահմանվի 5-10 տարվա պատիժ:

Անչափահասին թմրամիջոց վաճառելու համար կսահմանվի 8-15 տարվա պատիժ:

Սեփական օգտագործման համար թմրամիջոց աճեցնելու, արտադրելու, ձեռք բերելու կամ պահելու համար  պատիժ-տուգանքը կսահմանվի 20-ապատիկի չափով, ազատազրկման ձևով պատիժը կսահմանվի 2 տարի ժամկետով: 

Խոշոր չափերով կամ տեղեկատվական տեխնոլոգիաների միջոցով թմրամիջոց ձեռք բերելու դեպքում պատիժ-տուգանքը կսահմանվի 20-ապատիկից մինչև 40-ապատիկը, ազատազրկման ձևով պատիժը 4 տարի ժամկետով:

Անչափահասի ներգրավմամբ կամ անչափահասի նկատմամբ, ինչպես նաև առանձնապես խոշոր չափերով թմրամիջոց ձեռք բերելու դեպքում ազատազրկման ձևով պատիժը կսահմանվի 3-6 տարի: 

Սեփական օգտագործման համար մանր չափերով թմրամիջոց արտադրելու, պատրաստելու, ձեռք բերելու կամ պահելու համար տուգանքի ձևով պատիժը կկրկնապատկվի՝ 200-400 հազարի փոխարեն կսահմանվի 400-800 հազար դրամ: Նույն արարքը 1 տարվա ընթացքում կրկին կատարելու դեպքում 400-800 հազար դրամ պատժի փոխարեն կսահմանվի 800 հազարից մինչև 1 մլն 600 հազար դրամ պատիժ: